पाल्पा-स्वास्थ्यका लागि खेलकुद,राष्ट्रका लागि खेलकुद भन्ने नाराका साथ जिल्लाको रिब्दीकोट गाउँपालिकामा पालिकास्तरीय चौथो राष्ट्रपति रनिङ शिल्ड प्रतियोगिता, २०७९ सुरु भएको छ । खेल वडा न ५ को नयाँटोलको खेलमैदानमा शुरू भएको हो । खेलको शुभारम्भ गाउँपालिका अध्यक्ष नारायण बहादुर कार्कीले उद्घाटन गर्नुभएको हो । कार्यक्रमका प्रमुख अतिथि समेत रहनु भएका कार्कीले पालिका स्तरमा आयोजना हुने यस्ता खेलले खेलाडी पहिचान र राष्ट्रिय एवम अन्तराष्ट्रिय स्तरका खेलाडी उत्पादनमा टेवा पुर्याउने बताउनुभयो । खेलले खेलाडी उत्पादनमा मात्र नगरि शारीरिक स्वास्थ्यका लागि पनि महत्त्वपूर्ण भुमिका खेल्ने बताउदै खेलाडीहरूको अग्रिम बिजयीको शुभकामना व्यक्त गर्नुभयो ।
गाउँपालिका उपाध्यक्ष कान्ता अधिकारीले प्रतियोगिता हार र जित नभई मित्रता बढाउन र खेलाडीहरूमा रहेका प्रतिभा देखाउने उद्वेश्यले खेलकुद प्रतियोगिताको आयोजना गरिएको बताउनुभयो । गाउँपालिका उपाध्यक्ष अधिकारीले खेलकुदमा उत्कृत खेल प्रदर्शन गर्ने खेलाडीलाई अन्य जिल्ला स्तरीय खेलकुद प्रतियोगितामा सहभागी गराउने बताउनुभयो । कार्यक्रममा गाउँपालिकाका प्रमुख प्रशासकीय अधिकृत पवन अर्याल, शिक्षा शाखा प्रमुख मणि खनाल,रिब्दिकोट गाउँपालिका स्तरीय खेलकुद बिकास समितिको अध्यक्ष झपेन्द्र थापा पचभैया (दिपक),वडा न ५ का वडा अध्यक्ष मन बहादुर अस्लामीको आतिथ्यता लगायत अन्य जनप्रतिनिधि, कर्मचारीहरू, शिक्षकहरूको उपस्थितिमा उद्घाटन कार्यक्रम सम्पन्न भएको थियो । प्रतियोगिता माघ २६ गते सम्म चल्नेछ ।
