पाल्पा। पाल्पाका दश स्थानीय तहका जनप्रतिनिधि, कर्मचारीहरुसंग योजना तथा कार्यक्रम निर्माण, बजेट विनियोजन, बजेट निर्माणमा पूर्व तयारी विषयमा दुई दिने छलफल कार्यक्रम सकिएको छ । पाल्पा विकास केन्द्रको आयोजनामा छलफल चलेको हो । कार्यक्रममा लुम्बिनी प्रदेश मुख्यमन्त्री कार्यालयका सचिव रामप्रसाद पाण्डे, उपसचिव भविश्वर घिमिरेले योजना निर्माण, योजना तर्जुमाका चरण, बजेट निर्माण, सुशासन, अनुगमन, वित्तिय संघीय र व्यवस्थापनलगायतका विषयमा सहजीकरण्ण गरेका थिए ।
कार्यक्रममा पाल्पाका प्रमुख जिल्ला अधिकारी बन्धुप्रसाद बास्तोलाले जनप्रतिनिधि तथा कर्मचारीको उत्तरदायित्व, सुशासन, पारदर्शीताका विधि प्रक्रिया, लैङ्गिक बजेट निर्माण, कार्यान्वयन तथा लाभग्राहीको अवस्था बारेमा जानकारी दिएका थिए । लुम्बिनी प्रदेश भौतिक पूर्वाधार विकास मन्त्रालयका प्रवक्ता भीमार्जुन पाण्डेले पूर्वाधार विकासमा अन्तरनिहित सवालहरु, दिगोपना, पूर्वाधार निर्माणमा स्थानीय सरकारको भुमिका जिम्मेवारी तथा बजेटको कार्यान्वयनको बारेमा जानकारी गराएका थिए । कार्यशालामा जिल्ला समन्वय समिति पाल्पाका प्रमुख टंकनाथ खनालले सबैले संविधान ऐन नियम कानुन र कार्यविधिमा टेकेर काम गर्नुपर्नेमा जोड दिए ।
कार्यक्रममा स्थानीय सरकारको महत्व, प्रभावकारीता र भूमिका, संघिय सरकार र प्रदेश सरकारले नबुझेको वा बुझि बुझिकन पनि हस्तक्षेप गरेको कार्यक्रममा सहभागी जनप्रतिनिधीहरुले गुनासो गरेका थिए । अहिले प्रदेश तथा संघका एक दुई लाखकका बजेट पनि उपयोगिता विहिन तरीकाबाट विनियोजन भई फरफारकको अन्तिम समयमा आउने गरेको जनप्रतिनिधीहरुले गुनासो गरे ।
पाल्पा विकास केन्द्रका अध्यक्ष कृष्ण पोखरेलले संस्थाले प्रदेश स्थानीय सरकारको काममा व्यवस्थित , पारदर्शी, योजनाबद्ध तरीकाबाट सञ्जान होस भनी समय समयमा जनप्रतिनिधि र कर्मचारीहरु बीच समन्वय र सहकार्य गर्दै आएको बताए । संस्थाका कार्यक्रम संयोजक किरण कौशलले स्थानीय र प्रदेश सरकारका गतिविधिहरु, ऐन नियम कानुन, कार्यविधि सबै विषयहरुको जानकारीको लागी नीति पातो वेभ साईट संचालन गर्दै आएको जानकारी गराए । लुम्विनी प्रदेशका स्थानीय तहका सबै गतिविधि नीतिपात्रोमा रहेकोले सबैलाई प्रयोग गर्न कार्यक्रम संयोजक कौशलले अनुरोध गरे । कार्यक्रममा जिल्लाका दश वटै पालिकाका जनप्रतिनिधी र कर्मचारीकाे सहभागिता रहेको थियो ।
