पाल्पा । पाल्पा अस्पतालको सेवा थप प्रभावकारी बनाइने भएको छ । अस्पतालका अध्यक्ष गुरास आत्रेयले पाल्पा अस्पतालको स्वास्थ्य सेवा प्रवाहलाई समयसापेक्ष प्रभावकारी र गुणस्तरीय बनाउँदै लैजाने बताउनुभएको छ ।
अस्पतालको स्वास्थ्य गुणस्तर वृद्धिका विषयमा पत्रकारसँगहरुको अन्तरक्रिया कार्यक्रममा अध्यक्ष आत्रेयले पाल्पा अस्पताललाई रेफर अस्पताल भन्दा उपचार गर्ने अस्पताल बनाउन नयाँ समिति लागि परेको बताउनुभयो ।
अस्पतालमा डाक्टर अभाव, तथा दरबन्दी अनुसार डाक्टर र कर्मचारी नहुदा समस्या हुँदाहुँदै पनि अस्पतालले आम नागकिरहरुलाई उचित स्वास्थ्य सेवा प्रदान गर्दै आएको बताउनुभयो । उहाँले औषधीका लागि मात्र रेफर लिन पर्ने बाध्यता अन्त्य गर्ने प्रयास भइरहेको बताउनुभयो ।
पाल्पा अस्पतालको अक्सिजन प्लान्टबाट उत्पादन हुने अक्सिजनले जिल्लामा आवश्यक अक्सिजनको मात्रा पुरा गर्न सकिने र यहीबाट उत्पादित अक्सिजन सहुलियत मूल्यमा स्थानीय अस्पतालहरु र व्यवसायिक प्रयोजनका लागि उपलब्ध गराउँदै आएको अध्यक्ष आत्रेयले बताउनुभयो । अध्यक्ष आत्रेयले आफ्नो कार्यकालमा माइनर भएपनी शल्यक्रिया सेवा शुरु गर्ने योजना रहेको बताउनुभयो ।
पाल्पा अस्पतालका निमित्त मेडिकल सुपरिटेन्डेन्ट डा. विवेक भण्डारीले अस्पतालले २४ घन्टे ईमर्जेन्सी, फार्मेसी, प्रयोगशाला लगायतका सेवा प्रदान गर्दै आएको बताउनुभयो । पाल्पा अस्पतालले पछिल्लो १० महिनामा झन्डै ७० हजारलाई सेवा दिएको दैनिक २३० जनाले सेबा लिने गरेको उहाँले बताउनुभयो ।
कार्यक्रमका प्रमुख अतिथि नेपाल पत्रकार महासंघ पाल्पाका अध्यक्ष रेखिराम रानाले अस्पतालको भैतिक संरचना बलियो हुनुपर्ने बताउनुभयो । उहाँले पालिकामा स्वास्थ्यको राम्रो भौतिक अबस्था हुदा जिल्ला अस्पतालको भौतिक प्रगति हुन नसक्नु दु:खद रहेको धारणा राख्नुभयो । पाल्पा अस्पतालले दिने सेवा प्रभाहका बिषयमा प्रचार प्रसार हुन जरुरी रहेको उहाँले बताउनुभयो ।
कार्यक्रम अस्पतालका अध्यक्ष गुराँस आत्रेयको अध्यक्षता र सुशील ज्ञवालीको संचालनमा सम्पन्न भएको हो ।
