पाल्पा । पाल्पामा भारतबाट अवैध रुपमा भित्र्याइएको मलको भण्डारण फेला परेको छ । जिल्ला प्रहरी कार्यालय पाल्पाले दिएको जानकारी अनुसार जिल्लाको रामपुर नगरपालिका बेझाड स्थित एक घको सटरमा शनिबार दिउँसो अवैध मल फेला परेको हो ।
सोही नगरपालिका–६ बस्ने विजय श्रेष्ठको वडा नम्बर ५ मा अवस्थित घरको सटरमा ६५० बोरा मल फेला परेको हो । गोप्य सूचनाको आधारमा नगरपालिकाकी उप प्रमुख बालकुमारी थापाको संयोजकत्वमा गएको अनुगमन टोलीले अवैध मल फेला पारेको हो । प्रधानमन्त्री भारतीय जनउर्वर परियोजना भारत युरिया नामक रसायनिक मल बरामद गरिएको हो । यसअघि शनिबार दिउँसो नै प्रहरीले नवलपरासीबाट पाल्पातर्फ लैजाँदै गरको सोही नामको मल बरामद गरेको थियो ।
पाल्पाको रम्भा गाउँपालिका–१ हुँगी कालिगण्डकी करिडोर खण्डमा प्रहरीले अवैध मल बरामद गरेको थियो । प्रहरी चौकी हुँगीले चेकजाँच गर्ने क्रममा एक ट्रक अवैधमलसहित चालकलाई समेत नियन्त्रणमा लिएको थियो ।
जिल्ला प्रहरी कार्यालय पाल्पाले दिएको जानकारी अनुसार नवलपरासीबाट पाल्पातर्फ लैजाँदै गरेको लु २ ख ३८१ नम्बरको ट्रकमा ३७२ बोरा अवैध मल बरामद गरिएको थियो। २ लाख ९७ हजार ६ सय मूल्य बराबरको उक्त मल ओसारपसार गरिरहेको ट्रकमा जनउर्बर भारत परियोजना युरिया नाम मल बरामद गरिएको हो। आवश्यक अनुसन्धानका लागि भन्सार कार्यालय पठाउने तयारी रहेको प्रहरीले जनाएको छ ।
रामपुर नगरपालिकाका प्रमुख रमणबहादुर थापा, उपप्रमुख बालकुमारी थापा, प्रमुख प्रशासकिय अधिकृत लेखनाथ न्यौपाने, कृषि शाखा प्रमुख रामहरी पाण्डेय, रामपुर ५ का वडाध्यक्ष दुर्गाप्रसाद पोखरेल, रामपुर उद्योग वाणिज्य संघका अध्यक्ष भोजेन्द्रप्रकाश ढकाल सहित प्रहरी र पत्रकारहरुको उपस्थितिमा अनुगमन गरिएको छ । रासायनिक मल, त्यसका विल, आयात गर्ने व्यापारी लगायतका विषयमा अनुसन्धान भइरहेको प्रहरीले जनाएको छ ।
