तानसेन । पाल्पामा मोटरसाइकल दुर्घटना हुँदा एक जनाको मृत्यु भएको छ। मृत्यु हुनेमा रम्भा गाउँपालिका १ असेर्दी बस्ने २८ वर्षीय हेमन्त घर्ती रहेकोे प्रहरीले जनाएको छ।
आइतबार बेलुका रम्भा गाउँपालिका १ को भुमरमा भएको दुर्घटनामा उनको घटनास्थलमै मृत्यु भएको जिल्ला प्रहरी कार्यालय पाल्पाका सूचना अधिकारी श्रीराम भट्टले जानकारी दिए।
कालीगण्डकी करिडोर अन्तर्गत पिपलडाडादेखि हुगीतर्फ जाँदै गरेको ग १४ प ३७५ नम्बरको मोटरसाइकल सडकदेखि करिब दुई सय मिटर तल कालीगण्डकी किनारमा खसेर दुर्घटना भएको प्रहरीले जनाएको छ।
मोटरसाइकलका चालक रहेका मृतकको शवलाई पोस्टमार्टम गर्न रामपुर अस्पतालमा पठाइ घटनाबारे थप अनुसन्धान जारी रहेको प्रहरीले जनाएको छ।
