जेठ ५,बुटवल ।
रुपन्देहीको क्रिमसन अस्पतालमा उपचाररत गुल्मीका कोरोना संक्रमितको अवस्था गम्भीर भएपछि भेन्टिलेटरमा राखेर उपचार भइरहेको छ ।
जेठ १ गते जन्डिसले थलिएर आएका अस्पताल आइपुगेका उनलाई शुरुमा आईसियुमा राखेर उपचार गरिएको तर अवस्थामा सुधार नभएपछि २ गतेबाट भेन्टिलेटरमा राखेर उपचार भइरहेको अस्पतालले जनाएको छ ।
गुल्मीको मदाने गाउँपालिका ६ का ४१ बर्षिय उनलाई कोरोना संक्रमणको पुष्टि सोमबार भएको हो । जन्डिसले थलिएर आएका उनको रुपन्देहीको तिलोत्तमा नगरपालिका मणिग्रामस्थित क्रिमसन अस्पतालमा उपचार भइरहेको हो ।
अस्पतालमा उपचाररत व्यक्तिमा कोरोना देखिएपछि अहिले अस्पताललाई शिल गरिएको छ । उनको सम्पर्कमा रहेका व्यक्तिहरुको खोजी पनि थालिएको छ ।
उता अर्घाखाँचीको सन्धिखर्कमा रहेको छाया पोलिक्लिनिक पनि शिल गरिएको छ । संक्रमित भनिएका गुल्मीका शिक्षकले सन्धिखर्कमा रहेको क्लिनिकमा चेकजाँच गराएको र उनलाई कोरोना पुष्टी भएपछि मेडिकल शिल गरिएको मेडिकल प्रशासनले जनाएको छ ।
