असार ६,गुल्मी ।
पहिरोले जीप पुर्दा गुल्मीमा एक जनाको ज्यान गएको छ भने पाँच जना घाइते भएका छन्।
धुर्कोट गाउँपालिका वडा नम्बर ३ हाडहाडेमा अर्घाखाँचीको मालारानी–हाडहाडे हुँदै धनमुडा जाँदै गरेको ग १ ज ३९९७ नम्बरको जीप चुने ओडार भन्ने स्थानमा पहिरोले पुरेको हो।
जीपमा सवार ६ जनामध्ये अन्दाजी वर्ष १८ धुर्कोट गाउँपालिका–३ का तुल्सीराम काउछाको ज्यान गएको छ।
सोही स्थानकै चालक प्रदीप पुन र रमेश राना गम्भीर घाइते भएका छन्। घाइतेमध्ये स्थानीय केशव काउछा, खिम बहादुर काउछा र विशाल काउछाको अवस्था सामान्य रहेको धुर्कोट गाउँपालिका अध्यक्ष भुपाल पोख्रेलले बताए।
उनीहरुलाई उपचारको लागि अर्घाखाँचीको सन्धिखर्क लगिएको इलाका प्रहरी कार्यालय पुर्कोटदह गुल्मीका प्रहरी निरिक्षक पकंज चुँदालीले जानकारी दिए।
