पाल्पाको रैनादेवी छहरा गाउँपालिका-८, टाडीमा बस दुर्घटना हुँदा ६ जनाको मृत्यु भएको छ भने १८ जना घाइते भएका छन् । रूपन्देहीको सालझण्डीबाट पाल्पाको रैनादेवी छहराको खुर्साने जाँदै गरेको ग १ ख ४९७७ नम्बरको बस दुर्घटनामा परेको हो ।
दुर्घटनामा परि मृत्यु हुनेमा पाल्पा रैनादेबी ८ खुर्साने गाँउकी ३६ वर्षिया निर्मला घिमिरे, ११ वर्षिया सरुमाया घिमिरे, ५४ वर्षिया खिमकुमारी राना, ४० वर्षिया गिरिकुमारी गाहा, २१ वर्षिया सामकुमारी खत्री र १९ वर्षिया बिना पाण्डे रहेका छन् ।प्रहरीका अनुसार घाइते भेटिएका १५ जना मध्ये पनि १३ जना महिला र ४ जना पुरुष रहेका छन्।
दुर्घटनामा परेको ग १ ख ४९७७ नम्बरको बस रुपन्देहीको सालझण्डीबाट यात्रु लिएर खुसार्ने जाँदै थियो । दुर्घटनामा परि सवारी चालक पनि घाइते भएका छन् । चालकका अनुसार ब्रेक फेल हुँदा बस दुर्घटना भएको हो ।प्रहरीलाई राति १० बजेतिर दुर्घटनामा परेका घाइतेले नै फोन गरेर घटनाबारे जानकारी गराएका थिए। घाइतेहरुको लुम्बिनी प्रादेशिक अस्पतालमा उपचार भइरहेको जिल्ला प्रहरी कार्यालय पाल्पाले जनाएको छ । बस सडकबाट ५० मिटर तल भिरमा खसेको थियो । रातको समय जंगल क्षेत्रमा दुर्घटना भएकाले समयमा उद्धार हुन नसक्दा ठुलो संख्यामा यात्रुको ज्यान गएको बताइएको छ ।
