तानसेन। पाल्पाबाट यो वर्ष चार हजार ५४६ जना विद्यार्थी माध्यमिक शिक्षा परीक्षा (एसइई) मा सहभागी हुने भएका छन् । जिल्लाभरिका १३७ विद्यालयका चार हजार ५४६ जना विद्यार्थीले एसइई परीक्षाका लागि रजिस्ट्रेसन भरेको शिक्षा विकास तथा समन्वय इकाई पाल्पाले जनाएको छ । जसमध्ये छात्रा दुई हजार २५७ र छात्र दुई हजार २८९ परीक्षामा सहभागी हुने इकाई प्रमुख महेन्द्र सुवेदीले जानकारी दिए।
परीक्षामा नियमिततर्फ चार हजार ४३२ र ग्रेड वृद्धितर्फ ११४ जना विद्यार्थी रहेका छन् । यस्त प्राविधिक धारतर्फ २३९ जना विद्यार्थीहरू परीक्षामा सहभागी हुने प्रमुख सुवेदीले बताए ।
जिल्लामा सबै भन्दा कम ६८ जना दर्लमडाँडा मावि दर्लमडाँडा केन्द्रबाट र सबै भन्दा बढी २८६ जना विद्यार्थी दरैठाँटी मावि रामपुर केन्द्रबाट सहभागी हुने बताइएको छ ।
परीक्षाका लागि २७ वटा केन्द्र निर्धारण गरिएको छ । जसका लागि २७ जना केन्द्राध्यक्ष, ३१ जना सहायक केन्द्राध्यक्ष, २२६ निरीक्षक, ४६ जना परीक्षा सहायक, ९१ जना विद्यालय सहयोगी र १३५ जना सुरक्षाकर्मी परिचालन गरिएको छ ।
परीक्षालाई मर्यादित बनाउन आवश्यक निर्देशन समेत दिइएको इकाईले जनाएको छ ।
