पाल्पा । कोरिया अन्तर्राष्ट्रिय सहयोग नियोग (कोइका) को आर्थिक सहयोगमा तिनाउँ गाउँपालिकामा तरकारी तथा फलफूल मूल्य शृङ्खला विकाससम्बन्धी महत्वाकांक्षी परियोजना सञ्चालन हुने भएको छ। कृषकको आम्दानी वृद्धि, उत्पादन वृद्धि तथा कृषि क्षेत्रको व्यवसायिकीकरण गर्ने लक्ष्यसहित ल्याइएको यस परियोजनाले गाउँपालिकाको आर्थिक विकासमा महत्वपूर्ण योगदान पुर्याउने अपेक्षा गरिएको छ।
बिहीबार कोइकाको एक विशेषज्ञ टोलीले गाउँपालिकाका जनप्रतिनिधि तथा कर्मचारीहरूसँग प्रारम्भिक छलफल तथा अन्तरक्रिया कार्यक्रम सम्पन्न गरेको छ। कार्यक्रममा स्थानीय कृषि अवस्था, उत्पादन क्षमता, बजार पहुँच, कृषकका समस्या तथा सम्भावनाबारे गहन छलफल गरिएको थियो।
कार्यक्रममा सहायक कृषि विकास अधिकृत हेमन्त कुमार शर्माले परियोजनाले तिनाउँका कृषकहरूलाई प्रत्यक्ष लाभ पुर्याउने विश्वास व्यक्त गर्नुभयो। उहाँले आधुनिक कृषि प्रविधि, उत्पादन व्यवस्थापन र प्रभावकारी बजारीकरणमार्फत कृषिमा समृद्धिको आधार तयार हुने बताउनुभयो ।
प्रोजेक्ट म्यानेजर डा. डोङ्ग ह्वाङ किमले परियोजनाअन्तर्गत तरकारी तथा फलफूल खेतीका लागि आवश्यक आर्थिक सहयोग, प्रविधि हस्तान्तरण, उत्पादन, संकलन, भण्डारण, प्रशोधन तथा बजारीकरणसम्मका सम्पूर्ण पक्षमा सहकार्य गरिने जानकारी दिनुभयो । उहाँका अनुसार तिनाउँ गाउँपालिकालाई यसको उच्च कृषि सम्भावना र भौगोलिक अनुकूलताका आधारमा प्राथमिकतामा राखिएको बताउनुभयो ।
त्यस्तै, फिल्ड म्यानेजर जोङ्ग ह्योन सिनले परियोजना करिब ६ वर्षसम्म सञ्चालन हुने जानकारी दिँदै पहिलो चरणमा सम्भाव्यता अध्ययन गरी विस्तृत कार्ययोजना तयार गरिने बताउनुभयो। त्यसपछि क्रमशः उत्पादन वृद्धि, कृषक क्षमता अभिवृद्धि तथा बजार सुदृढीकरणका कार्यक्रमहरू कार्यान्वयन गरिने उहाँले स्पष्ट पार्नुभयो ।
गाउँपालिका अध्यक्ष प्रेम श्रेष्ठले तिनाउँमा कृषि क्षेत्रलाई दीर्घकालीन विकासको प्रमुख आधारका रूपमा अघि सार्दै उच्च प्राथमिकताका साथ विभिन्न कार्यक्रमहरू सञ्चालन गरिँदै आएको बताउनुभयो। उहाँका अनुसार पछिल्ला केही वर्षहरूमा परम्परागत खेती प्रणाली क्रमशः व्यवसायिक र आधुनिकतर्फ रूपान्तरण हुँदै गएको छ, जसले कृषकहरूको आम्दानीमा सकारात्मक प्रभाव पार्न थालेको जानकारी दिनुभयो ।
उहाँले विशेषगरी युवाहरूको कृषितर्फ बढ्दो आकर्षणलाई सकारात्मक संकेतका रूपमा लिँदै गाउँपालिकाले कृषिमा नवप्रवर्तन, प्रविधि प्रयोग तथा उद्यमशीलता विकासमा जोड दिँदै आएको उल्लेख गर्नुभयो । “अबको हाम्रो लक्ष्य केवल उत्पादन बढाउने मात्र होइन, उत्पादनलाई बजारसँग जोड्ने, मूल्य अभिवृद्धि गर्ने र कृषकलाई आत्मनिर्भर बनाउने हो,” उहाँले भन्नुभयो।
अध्यक्ष श्रेष्ठले यस परियोजनामार्फत तिनाउँ गाउँपालिकाले अघि सारेका कृषि विकासका योजनाहरूलाई अझ प्रभावकारी रूपमा कार्यान्वयन गर्न सहयोग पुग्ने विश्वास व्यक्त गर्नुभयो। उहाँले अन्य पालिकाले अझै सोचमै सीमित राखेका कतिपय कामहरू—जस्तै एकीकृत कृषि प्रणाली, व्यवस्थित बजारीकरण, प्रशोधन केन्द्र स्थापना तथा कृषिमा आधारित उद्यम विकास—तिनाउँमा व्यवहारिक रूपमा लागू गरिने स्पष्ट पार्नुभयो ।
उपाध्यक्ष लाल बहादुर थापाले कृषकहरूको हितका लागि गाउँपालिकाले विभिन्न कार्यक्रमहरू सञ्चालन गर्दै आएको जानकारी दिनुभयो । उहाँले कृषक कार्ड वितरण, स्थानीय हाटबजार व्यवस्थापन तथा उत्पादन बिक्रीका लागि सहज वातावरण निर्माण गरिएको बताउनुभयो ।
परियोजनाका संयोजक विष्णु पौडेलले कोइकाको सहयोगमा सञ्चालन हुन लागेको यस परियोजनाले तिनाउँ गाउँपालिकामा कृषि मूल्य शृङ्खलाको विकासमा नयाँ आयाम थप्ने विश्वास व्यक्त गर्नुभयो। उहाँले उत्पादनदेखि बजारीकरणसम्मको सम्पूर्ण प्रक्रिया व्यवस्थित गर्दै कृषकको आम्दानी वृद्धि गर्ने लक्ष्य राखिएको बताउनुभयो।
तिनाउँ गाउँपालिकामा प्रशस्त खेतीयोग्य जमिन रहेको र त्यसको प्रभावकारी उपयोगमार्फत कृषि आत्मनिर्भरता हासिल गर्ने लक्ष्यसहित परियोजना अघि बढाइने जनाइएको छ। आधुनिक प्रविधिको प्रयोग, सिँचाइ सुधार तथा बजार पहुँच विस्तारमार्फत कृषि क्षेत्रलाई थप सुदृढ बनाइने अपेक्षा गरिएको छ।
कृषि क्षेत्रलाई केवल जीविकोपार्जनको माध्यम नभई आर्थिक समृद्धिको आधारका रूपमा विकास गर्ने रणनीति अवलम्बन गरेको छ। यस परियोजनाले आधुनिक प्रविधि, सीप विकास, लगानी तथा बजार पहुँचलाई एकीकृत गर्दै कृषकलाई प्रत्यक्ष लाभ पुर्याउने र समग्र गाउँपालिकाको आर्थिक रूपान्तरणमा टेवा पुग्ने गाउँपालिकाको विश्वास रहेको छ।
समग्रमा, (कोइका) को सहयोगमा तिनाउँ गाउँपालिका मा सञ्चालन हुन लागेको यो परियोजना कृषकको जीवनस्तर उकास्ने, रोजगारी सिर्जना गर्ने र ग्रामीण अर्थतन्त्र सुदृढ बनाउने दिशामा महत्वपूर्ण पहलका रूपमा हेरिएको छ।
सम्बन्धित खवर
