पाल्पा —पाल्पाको रम्भा गाउँपालिकामा शुक्रबारदेखि १७ औं राष्ट्रपति रनिङ शिल्ड प्रतियोगिता र सातौं गाउँपालिकास्तरीय रनिङ शिल्ड प्रतियोगिता सुरु भएको छ। तीन दिनसम्म चल्ने प्रतियोगिता असर्दी खेलमैदानमा भव्य उद्घाटनसँगै सुरु भएको हो। उद्घाटन कार्यक्रममा गाउँपालिकाका विभिन्न तहका पदाधिकारी, शिक्षक र अभिभावकको उपस्थिती रहेको थियो।। तीन दिनसम्म चल्ने प्रतियोगितामा नौ विद्यालयका ५९२ विद्यार्थीले सहभागिता जनाएका छन्।
प्रतियोगितामा १५ वटा खेलकुद विधामा छात्र–छात्रा प्रतिस्पर्धा हुने छ। यस वर्ष ७४ स्वर्ण, ७४ रजत र ११० कांस्य पदकका लागि खेलाडीहरूले प्रतिस्पर्धा गर्नेछन्। भलिबल, कबड्डी, एथलेटिक्स दौड, हाइजम्प, लङ्जम्प, ट्रिपलजम्प, ज्याभलिन थ्रो र सटपुट प्रमुख खेलका रुपमा रहेको छ।
उद्घाटन कार्यक्रममा अध्यक्ष विष्णुप्रसाद भण्डारीले विद्यालयबाट बढी विद्यार्थी सहभागी भएमा मात्र प्रदेश र संघस्तरमा सफलता सम्भव हुने र प्रतियोगिताले विद्यार्थीको प्रतिभा चिन्ने अवसर पनि प्रदान गर्ने बताउनु भयो।
प्रमुख प्रशासकीय अधिकृत वीरबहादुर पुनले पदक जित्न निरन्तर अभ्यास र मिहिनेत आवश्यक रहेको बताउदै,प्रतियोगितामा सहभागी हुदैमा सफलता हात पार्न नसकिने हुदाँ पदक जित्न विद्यार्थीहरूले निरन्तर अभ्यास र मिहिनेत गर्नुपर्छ र विद्यालयमा समेत खेलकुदमा नियमित भाग लिने विद्यार्थीहरूलाई मात्र सफलता हात लाग्ने हुनाले शिक्षक र अभिभावकले पनि विद्यार्थीलाई प्रेरित गर्दै नियमित तालिम र प्रशिक्षणमा सहयोग गर्नुपर्ने बताउनु भयो ।
वडा न १ का वडाध्यक्ष ईश्वर काफ्लेले , “राष्ट्रपति रनिङ शिल्ड जस्ता प्रतियोगिताले साना उमेरदेखि नै खेलप्रति रुचि जगाउने महत्व राख्छ। विद्यार्थीले प्रारम्भिक चरणदेखि नै खेलकुदमा सक्रिय रहँदा उनीहरूको शारीरिक र मानसिक विकासमा पनि सकारात्मक प्रभाव पार्ने धारणा राख्नुभयो ।
रम्भा गाउँपालिकाले उत्साह, अनुशासन र स्वास्थ्यको संदेश सहित विद्यार्थीहरूलाई खेलकुदमा प्रेरित गर्ने उद्देश्यका साथ प्रतियोगिता आयोजना गरेको छ।
