गाउँपालिकाका सबै ६ वटै वडाबाट महिला र पुरुष गरी जम्मा १२ टोलीको सहभागिता रहेको प्रतियोगितामा पुरुषतर्फ तिनाउ–५ ले उत्कृष्ट प्रदर्शन गर्दै प्रथम स्थान हासिल गरेको थियो। फाइनल खेलमा तिनाउ–४ लाई सोझो सेटमा पराजित गर्दै तिनाउ–५ विजेता बनेको हो। तिनाउ–४ दोस्रो स्थानमा सीमित रहँदा तिनाउ–६ तृतीय र तिनाउ–१ सान्त्वना स्थानमा रहेका थिए। तिनाउ–५ ले लगातार तीन पटक उपाधि जित्दै रनिङ शिल्ड समेत आफ्नो नाममा पार्न सफल भएको थियो।
महिलातर्फ तिनाउ–६ ले प्रथम स्थान हासिल गरेको थियो भने तिनाउ–०४ दोस्रो, तिनाउ–५ तृतीय तथा तिनाउ–१ सान्त्वना स्थानमा रहेका थिए। महिला तथा पुरुष दुवै स्पर्धामा खेलाडीहरूले उच्चस्तरीय प्रतिस्पर्धा, समन्वय र खेल भावना प्रदर्शन गरेका थिए।
प्रतियोगिताका विजेता तथा उपविजेता टोलीहरूलाई नगद पुरस्कार, ट्रफी र मेडल प्रदान गरिएको थियो। पुरुषतर्फ प्रथम हुने तिनाउ–५ लाई रु ९३,३३३.३३, द्वितीय हुने तिनाउ–४ लाई रु ५३,३३३.३३, तृतीय हुने तिनाउ–६ लाई रु ३३,३३३.३३ र सान्त्वना स्थान प्राप्त गर्ने तिनाउ–१ लाई रु १३,३३३.३३ प्रदान गरिएको थियो। महिलातर्फ प्रथम हुने तिनाउ–६ लाई रु ४०,०००, द्वितीय हुने तिनाउ–०४ लाई रु २६,६६६.६६, तृतीय हुने तिनाउ–५ लाई रु १३,३३३.३३ र सान्त्वना स्थान प्राप्त गर्ने तिनाउ–१ लाई रु ६,६६६.६६ प्रदान गरिएको थियो।
समापन समारोहमा गाउँपालिका अध्यक्ष प्रेम श्रेष्ठ प्रमुख अतिथिका रूपमा उपस्थित रहनुभएको थियो। कार्यक्रममा उपाध्यक्ष लालबहादुर थापा, प्रमुख प्रशासकीय अधिकृत दिनेश सारु, विभिन्न वडाका अध्यक्षहरू, राजनीतिक दलका प्रतिनिधिहरू, सिद्धबाबा मन्दिर विकास समितिका पदाधिकारी तथा अन्य सरोकारवालाहरूको उपस्थिति रहेको थियो।
कार्यक्रममा बोल्दै प्रमुख अतिथि अध्यक्ष प्रेम श्रेष्ठले खेलकुदले युवाहरूमा अनुशासन, एकता र सकारात्मक सोच विकास गर्ने बताउँदै यस्ता प्रतियोगिताले समाजलाई सकारात्मक दिशातर्फ डोर्याउने उल्लेख गर्नुभयो। उहाँले युवाहरूलाई कुलतबाट टाढा रही खेलकुदमा सक्रिय हुन आग्रह गर्नुभयो।
त्यसैगरी उपाध्यक्ष लालबहादुर थापाले खेलकुद जीवनको महत्वपूर्ण हिस्सा भएको बताउँदै जित–हारलाई सामान्य रूपमा लिन र खेल भावना कायम राख्न खेलाडीहरूलाई सुझाव दिनुभयो।
प्रमुख प्रशासकीय अधिकृत दिनेश सारुले खेलकुदले शारीरिक तथा मानसिक स्वास्थ्य सुदृढ बनाउने उल्लेख गर्दै स्थानीय तहले खेल क्षेत्रको विकासमा निरन्तर सहयोग गर्ने प्रतिबद्धता व्यक्त गर्नुभयो।
कार्यक्रमका अध्यक्ष तथा तिनाउ युवा समन्वय समितिका अध्यक्ष चित्रबहादुर थापाले प्रतियोगिता सफल पार्न सहयोग गर्ने सबै पक्षप्रति आभार व्यक्त गर्दै खेलाडीहरूको अनुशासन, मेहनत र समर्पण प्रशंसनीय रहेको बताउनुभयो। उहाँले आगामी दिनमा अझ व्यवस्थित र स्तरिय प्रतियोगिता आयोजना गरिने जानकारी दिनुभयो।
प्रतियोगितामा महिला तथा पुरुष दुवै तर्फ उत्कृष्ट प्रदर्शन गर्ने खेलाडीहरूलाई बेस्ट लिब्रो, बेस्ट सर्भर, बेस्ट सेटर, बेस्ट स्पाइकर, बेस्ट ब्लकर र बेस्ट प्लेयर अवार्ड समेत प्रदान गरिएको थियो।
समापन कार्यक्रममा वक्ताहरूले खेलकुदले समाजमा एकता, सहकार्य र भाइचाराको भावना अभिवृद्धि गर्ने भन्दै युवाहरूलाई खेलमार्फत आफ्नो क्षमता उजागर गर्न र राष्ट्र निर्माणमा योगदान दिन आह्वान गरेका थिए। यस प्रतियोगिताले स्थानीय स्तरमा खेलकुद विकासका साथै युवाहरूलाई सकारात्मक मार्गमा अघि बढाउन महत्वपूर्ण भूमिका खेलेको जनाइएको छ।
सम्बन्धित खवर
