काठमाडौँ । फागुन २१ गते हुने प्रतिनिधि सभाको निर्वाचनमा सबै भन्दा बढी चर्चामा रहेको क्षेत्र मध्ये एक बागमती प्रदेश अन्तर्गतको चितवन- २ पनि चर्चामा रहेको छ । यस क्षेत्रमा राष्ट्रिय स्वतन्त्र पार्टी (रास्वपा) का सभापति रवि लामिछाने उम्मेदवार रहेका कारण यो क्षेत्र चर्चामा रहेको छ ।
निर्वाचन आयोगका अनुसार चितवन-२ मा मतदान गर्न सक्ने कुल मतदाताको संख्या एक लाख ३७ हजार १५२ जना रहेका छन् । यस क्षेत्रमा यस निर्वाचनमा १५२ मतदान केन्द्र तोकिएको छ ।
पछिल्लो निर्वाचन
चितवन- २ मा रवि लामिछानेले नागरिकता विवादका कारण सांसद पद गुमाएपछि २०८० को बैशाखमा उपनिर्वाचन भएको थियो । सो उपनिर्वाचनमा लामिछानेले ५४ हजार १७६ मत प्राप्त गर्दै विजयी भएका थिए । दोस्रो स्थानमा रहेका काँग्रेसका जीत नारायण श्रेष्ठले ११ हजार २१४ मत प्राप्त गरेका थिए भने एमालेका राम प्रसाद न्यौपानेले १० हजार ९३६ मत प्राप्त गरेका थिए ।
टी अघि २०७९ को निर्वाचनमा यस क्षेत्रबाट लामिछाने ४९ हजार ३०० मत प्राप्त गर्दै विजयी भएका थिए भने दोस्रो भएका काँग्रेसका उमेश श्रेष्ठले १४ हजार ९८८ मत प्राप्त गरेका थिए । त्यस्तै एमालेका कृष्ण भक्त पोख्रेलले १४ हजार ६५२ मत पाएका थिए ।
त्यसैगरी २०७९ को समानुपातिकतर्फ रास्वपाले ३५ हजार ९४५ मत प्राप्त गरेको थियो भने एमालेले १६ हजार ७८४ मत पाएको थियो । त्यस्तै काँग्रेसले १२ हजार १३२ मत प्राप्त गरेको थियो ।
उम्मेदवार- २०८२ यस निर्वाचनमा चितवन- २ मा राजनीतिक दल र स्वतन्त्र गरेर २३ जना उम्मेदवार चुनावी मैदानमा रहेका छन् । यस क्षेत्रमा रास्वपा सभापति रवि लामिछाने तेस्रो पटक उम्मेदवार बनेका छन् । त्यस्तै नेपाली काँग्रेसले समाजसेवी मीना खरेललाई उम्मेदवार बनाएको छ भने एमालेबाट अस्मिन घिमिरे उम्मेदवार रहेका छन् । त्यसैगरी नेकपाले प्रताप गुरुङलाई उम्मेदवार बनाएको छ ।
निष्कर्ष:
यस निर्वाचनमा एकातिर मिडिया र सामाजिक सञ्जालमा रास्वपाको पक्षमा एक किसिमको लहर देखिएको छ भने चितवनमा काँग्रेसले समाजसेवी मीना खरेललाई रणनीतिक उम्मेदवारको रुपमा मैदानमा उतारेका कारण रविलाई अलिकति चुनौती हुनसक्ने देखिएको छ । एमालेबाट पनि युवा उम्मेदवारअस्मिन घिमिरेले उम्मेदवारी दिएको भएपनि यस क्षेत्रमा मुख्य प्रतिष्पर्धा यस पटक रास्वपा र काँग्रेसबीच हुने देखिएको छ ।
रवि लामिछानेले अघिल्ला निर्वाचन क्षेत्रमा ठुलो मतान्तरले जितेको र रास्वपाको आधार इलाकाको रुपमा रहेको चितवनमा उनको प्रभाव छ नै । तर यस पटक धेरै मतदाताले रविविरुद्धका मुद्धा र उनी निर्वाचित भए पनि सांसदको शपथ लिन नपाउने, फेरी उपनिर्वाचन हुनसक्ने जता प्रश्न उठाएका छन् । यसको फाइदा काँग्रेस उम्मेदवार खरेललाई हुने देखिन्छ । यस क्षेत्रका केहि मतदातासँग कुरा गर्दा उनीहरुले रास्वपाप्रति सहानुभूति देखाएपनि रविले जितेर पनि क्षेत्र जनप्रतिनिधि विहिन हुने अवस्था प्रति सचेत रहेको बताउछन् ।
अर्कोतर्फ भरतपुर-४ की स्थायी बासिन्दा अविवाहित खरेल विगत तीन दशकभन्दा बढी समयदेखि महिला अधिकार र बालबालिकाको पुनःस्थापनामा सक्रिय रुपमा काम गर्दै आएकी छन् । साथै उनले महिलाले कानुनी सहयोग, सीपमूलक तालिम र आर्थिक आत्मनिर्भरतामा काम गरेका कारण चुनाव जित्ने दाबी काँग्रेसले गरेको छ ।
सम्बन्धित खवर
