पाल्पा– तानसेन नगरपालिका र दायित्व संस्थाको संयुक्त सहकार्यमा सञ्चालित वृद्धिमुखी उद्यमशीलता तथा रोजगारी प्रवर्द्धन कार्यक्रम सम्पन्न भएको छ । स्थानीय उद्यमीको क्षमता अभिवृद्धि, उत्पादन वृद्धि, व्यवसाय विस्तार, लगानी प्रवर्द्धन तथा रोजगारी सिर्जना गर्ने उद्देश्यले तानसेन नगरपालिकाको आर्थिक वर्ष २०८२/०८३ को स्वीकृत बजेटअन्तर्गत कार्यक्रम सञ्चालन गरिएको हो । कार्यक्रमका लागि तानसेन नगरपालिकाले ५० लाख रुपैयाँ तथा दायित्व संस्थाले १० लाख रुपैयाँ आर्थिक तथा प्राविधिक सहयोग उपलब्ध गराएका थिए। नगरपालिकाका १४ वटै वडाबाट उद्यमी तथा उत्कृष्ट कृषक छनोट गरी चरणबद्ध रूपमा तालिम, व्यवसायिक परामर्श, डिजिटल साक्षरता तथा लगानी प्रस्तुतीकरणमार्फत उत्कृष्ट उद्यमी छनोट गरिएको हो । कार्यक्रमअन्तर्गत नगरपालिकाका ११३ जना उद्यमी छनोट भएका थिए। पहिलो चरणमा ४० जनालाई व्यवसाय विकास तथा उद्यमशीलतासम्बन्धी तालिम प्रदान गरिएको थियो । त्यसपछि विभिन्न सूचकका आधारमा २० जना छनोट गरिएका थिए । दोस्रो चरण पार गरेका सहभागीलाई व्यवसाय व्यवस्थापन, डिजिटल साक्षरता र लगानी प्रस्तुतीकरणसम्बन्धी प्रशिक्षण प्रदान गरिएको थियो । अन्तिम मूल्याङ्कनपछि उत्कृष्ट १० जना उद्यमी छनोट गरिएका थिए। तीमध्ये सन्दीप अधिकारी (कृष्कम कृषि फार्म) उत्कृष्ट उद्यमी घोषित भएका हुन् ।
उत्कृष्ट १० उद्यमीमा सन्दीप अधिकारी (कृष्कम कृषि फार्म), भगवती पौडेल घिमिरे (कुट्टु कृषि फार्म), धनिश्वर बस्याल (होराइजन होमस्टे), ज्योत्सना बदन तुलाधर (कण्ठ लड्डू तथा हस्तकला उद्योग), समीक्षा राना (निशु बंगुर फार्म), लक्ष्मी पौडेल (लक्ष्मी सर्वोत्तम पिठो उद्योग), जमुना देवी न्यौपाने (महिमा कृषि तथा पशुपन्छी फार्म), दलबहादुर राजपुत (उमा पोल्ट्री तथा कृषि फार्म), ध्रुवराज भण्डारी (भण्डारी तरकारी खेती तथा नर्सरी फार्म) तथा महेश्वर पन्त (एकीकृत कृषि तथा पशुपालन फार्म) रहेका थिए । कार्यक्रमका प्रमुख अतिथि तानसेन नगरपालिकाका प्रमुख सन्तोषलाल श्रेष्ठलेस्थानीय सरकारको उद्देश्य भौतिक पूर्वाधार निर्माणसँगै नागरिकको आयआर्जन वृद्धि गर्नु रहेको बताउनुभयो । उद्यमशीलताको विकासले स्थानीय उत्पादन बढाउने, रोजगारी सिर्जना गर्ने र युवालाई विदेशिनबाट रोक्न महत्वपूर्ण भूमिका खेल्ने उल्लेख गर्नुभयो । नगरपालिकाले स्थानीय उत्पादनको ब्रान्डिङ, बजारीकरण र व्यवसाय विस्तारका लागि आगामी दिनमा पनि आवश्यक सहयोग गर्ने बताउनुभयो । तालिमबाट प्राप्त ज्ञान र सीपलाई व्यवहारमा उतारेर व्यवसायलाई थप प्रतिस्पर्धी बनाउन सहभागीलाई आग्रह गर्नुभयो । नगर उपप्रमुख प्रतिक्षा गाहा सिन्जालीले महिलासहित युवा र कृषिमा आधारित उद्यमीलाई आत्मनिर्भर बनाउने उद्देश्यले यस्ता कार्यक्रम सञ्चालन गरिएको बताउनुभयो । उत्पादनमुखी व्यवसायको विकासले स्थानीय अर्थतन्त्रलाई बलियो बनाउने उल्लेख गर्दै स्वरोजगार सिर्जना गर्न उद्यमीले नवीन सोच र आधुनिक प्रविधिको प्रयोग गर्नुपर्नेमा जोड दिनुभयो । नगरपालिकाले आगामी दिनमा पनि उद्यमशीलता विकासका कार्यक्रमलाई निरन्तरता दिने बताउनुभयो । प्रमुख प्रशासकीय अधिकृत चेतनाथ गिरीलेस्थानीय सरकारको प्रमुख लक्ष्य नागरिकको जीवनस्तर उकास्नु रहेको बताउनुभयो । सीप विकास, उद्यमशीलता प्रवर्द्धन र आयआर्जन वृद्धि गर्ने कार्यक्रमलाई प्रभावकारी रूपमा कार्यान्वयन गरिएको उल्लेख गर्दै तालिमबाट सिकेका ज्ञानलाई व्यवहारमा लागू गर्न सहभागीलाई आग्रह गर्नुभयो ।
नगरपालिकाका वरिष्ठ प्रशासकीय अधिकृत दुर्गाबहादुर थापाले वितरणमुखीभन्दा उत्पादनमुखी कार्यक्रमले मात्रै दीर्घकालीन उपलब्धि हासिल गर्न सकिने बताउनुभयो । उद्यमीले उत्पादनको गुणस्तर, प्याकेजिङ, ब्रान्डिङ, डिजिटल प्रवर्द्धन तथा बजारीकरणमा विशेष ध्यान दिनुपर्नेमा जोड दिनुभयो। स्थानीय उत्पादनलाई राष्ट्रिय बजारसम्म पुर्याउन स्थानीय सरकार, निजी क्षेत्र र उद्यमीबीच सहकार्य आवश्यक रहेको उल्लेख गर्नुभयो । तालिमबाट प्राप्त ज्ञान र सीपलाई व्यवहारमा उतारी व्यवसायलाई दिगो बनाउनुपर्ने बताउनुभयो । दायित्व संस्थाकी कार्यक्रम संयोजक स्नेहा शाक्यले वृद्धि हुने उद्यमीलाई लगानीमुखी उद्यमीका रूपमा विकास गर्ने उद्देश्यले कार्यक्रम सञ्चालन गरिएको बताउनुभयो । व्यवसायलाई दिगो र प्रतिस्पर्धी बनाउन डिजिटल साक्षरता, व्यवसायिक योजना निर्माण, वित्तीय व्यवस्थापन तथा लगानी प्रस्तुतीकरणसम्बन्धी व्यावहारिक ज्ञान प्रदान गरिएको जानकारी दिनुभयो । यस्ता कार्यक्रमले स्थानीय उद्यमीलाई आत्मविश्वासी र बजारमुखी बनाउन महत्वपूर्ण भूमिका खेल्ने बताउनुभयो । कार्यक्रममा नगर प्रवक्ता यादवसिंह कार्की, नगरपालिकाका कृषि शाखा प्रमुख कल्पना पोखरेल, पशु शाखाका विशाल बस्याल, पाल्पा उद्योग वाणिज्य संघका समीरमान सिंह, पाल्पा व्यापार संघका अध्यक्ष विष्णु कार्की, जनप्रतिनिधि, कर्मचारी, उद्यमी तथा सरोकारवालाको सहभागिता रहेको थियो ।
कार्यक्रमका अवसरमा उत्कृष्ट १० जना उद्यमीलाई तानसेन नगरपालिकाका उपप्रमुख प्रतिक्षा गाहा सिन्जाली, प्रमुख प्रशासकीय अधिकृत चेतनाथ गिरी तथा वरिष्ठ प्रशासकीय अधिकृत दुर्गाबहादुर थापाले सम्मानपत्र प्रदान गरी सम्मानित गर्नुभयो । उत्कृष्ट उद्यमी घोषित सन्दीप अधिकारी (कृष्कम कृषि फार्म)**लाई विशेष सम्मान प्रदान गरिएको थियो।
दायित्व संस्थाकी कार्यक्रम संयोजक स्नेहा शाक्यको अध्यक्षतामा सम्पन्न कार्यक्रममा सहभागीहरूले प्राप्त तालिम, ज्ञान र अनुभवले आफ्नो व्यवसायलाई थप व्यवस्थित र प्रतिस्पर्धी बनाउन सहयोग पुग्ने विश्वास व्यक्त गरेका थिए । आयोजकका अनुसार कार्यक्रमले स्थानीय उद्यमशीलताको विकास, रोजगारी सिर्जना र तानसेन नगरपालिकाको आर्थिक समृद्धिमा सकारात्मक योगदान पुर्याउने अपेक्षा गरिएको छ ।
सम्बन्धित खवर
