पाल्पा । रिब्दीकोट गाउँपालिका वडा नं. ५ स्थित ऐतिहासिक, धार्मिक, सांस्कृतिक तथा पर्यटकीय मान्यता बोकेको जलेश्वर मन्दिर (जलेश्वर धाम) परिसरमा यस वर्षको महाशिवरात्रिका अवसरमा आयोजना हुँदै गरिएको बृहत् शिवपुराण महायज्ञलाई सफल, व्यवस्थित र भव्य बनाउन स्थानीय तह, जनप्रतिनिधि, समाजसेवी तथा राजनीतिक दलका प्रतिनिधिहरू एकै ठाउँमा भेला भई विस्तृत तयारी बैठक सम्पन्न गरेका छन्।
रिब्दीकोट जलेश्वर पर्यटन क्षेत्र विकास समितिको आयोजनामा र गाउँपालिकाको सक्रिय सहजीकरणमा भएको उक्त छलफलमा गाउँपालिकाका सबै वडाध्यक्ष, विभिन्न राजनीतिक दलका जिम्मेवार तथा जलेश्वर मन्दिर व्यवस्थापन समितिका पदाधिकारीहरूको व्यापक उपस्थिति रहेको थियो। माघ २२ गतेदेखि फागुन ३ गतेसम्म १२ दिने महायज्ञ संचालन गरिँदै छ।
छलफलको अध्यक्षता गर्दै रिब्दीकोट गाउँपालिका अध्यक्ष नारायण बहादुर कार्कीले जलेश्वर क्षेत्रलाई धार्मिक–ऐतिहासिक धरोहरका रूपमा संरक्षण र प्रवर्द्धन गर्न महायज्ञले ठूलो योगदान पुर्याउने विश्वास व्यक्त गर्दै “जलेश्वर धामको पवित्रता र यसको ऐतिहासिक मूल्यलाई देशभर चिनाउने अवसर महायज्ञले दिलाउनेछ। हामीले जति प्रचार–प्रसार गर्छौँ, त्यति नै पर्यटक आकर्षित हुन्छन्। गाउँपालिकाले यसलाई दीर्घकालीन पर्यटकीय सम्भावनासँग जोडेर अघि लैजाने योजना बनाएको छ,” उहाँले बताउनुभयो।
उहाँले टपभूमि जलेश्वर क्षेत्रलाई धार्मिक पर्यटनको केन्द्र बिन्दु बनाउँदै आर्थिक तथा सामाजिक चहलपहल बढाउने लक्ष्यसमेत प्रस्तुत गर्नुभएको थियो।
गाउँपालिकाका उपाध्यक्ष कान्ता अधिकारीले महायज्ञले धार्मिक चेतना अभिवृद्धि हुने मात्र होइन, जलेश्वर क्षेत्रको दीर्घकालीन विकासमा महत्त्वपूर्ण टेवा पुग्ने बताउनु भयो ।
“महायज्ञले हाम्रो सांस्कृतिक मूल्य, परम्परा र धार्मिक आस्थालाई अझ संरक्षण र प्रवर्द्धन गर्नेछ। यसले स्थानीय समुदायमा एकता र श्रद्धाको वातावरण निर्माण गर्दै जलेश्वरलाई देशभर चिनाउन मद्दत पुर्याउनेछ,” उपाध्यक्ष अधिकारीकाे भनाई रहेको छ ।
त्यसैगरी प्रमुख प्रशासकीय अधिकृत सुरेश भुसालले जलेश्वर क्षेत्रको पर्यटकीय सम्भावना महायज्ञमार्फत अझ स्पष्ट र उजागर हुने बताउँदै भन्नुभयो “धार्मिक पर्यटन गाउँपालिकाको समग्र विकासको आधार बन्न सक्छ। महायज्ञजस्ता कार्यक्रमहरूले पर्यटक आकर्षण बढाएर आर्थिक गतिविधि विस्तार गर्ने विश्वास लिएको छु,” प्रमुख प्रशासकीय अधिकृत भुसालले सुपादेउराली खबरलाई बताउनुभयो।
कार्यक्रममा गाउँपालिकाका पूर्व अध्यक्ष नारायण बहादुर जिसीले महायज्ञलाई व्यवस्थित, अनुशासित र सफल बनाउन जनप्रतिनिधिदेखि स्थानीय नागरिकसम्म सबैले बराबर जिम्मेवारीका साथ सहभागी हुनुपर्नेमा जोड दिँदै “यो धार्मिक अनुष्ठान केवल विधिपूर्वक सम्पन्न गर्नु मात्र होइन, समुदायको एकता, आस्था र संस्कृतिको उजागर हो। सबै क्षेत्रबाट सक्रियता र सहयोग आवश्यक छ,” उहाँले स्मरण गराउनुभयो।
अन्तरक्रिया र छलफलमा सहभागी सबै राजनीतिक दलका प्रतिनिधिहरूले महायज्ञलाई सँधैभन्दा भव्य र अनुकरणीय बनाउने लक्ष्यसहित आ–आफ्नो भूमिकाबाट पूर्ण सहयोग गर्ने प्रतिबद्धता जनाएका थिए।
रिब्दीकोट जलेश्वर पर्यटन क्षेत्र विकास समितिका अध्यक्ष वेणिमाधव आचार्यले महायज्ञ तयारीका क्रममा सबै पक्षबाट प्राप्त एकमत समर्थनलाई अत्यन्तै सकारात्मकरूपमा लिँदै जलेश्वर क्षेत्रको दीर्घकालीन विकासमा यसले नयाँ दिशा दिने विश्वास व्यक्त गर्नुभयो। उहाँले धार्मिक, सांस्कृतिक र सामुदायिक एकतालाई जोड्ने कार्यमा महायज्ञ महत्वपूर्ण आधार बन्न सक्ने उल्लेख गर्दै “गाउँपालिकाका जनप्रतिनिधिदेखि राजनीतिक दलका प्रतिनिधि, स्थानीय सामाजिक अगुवासम्म सबैले आफ्नो भूमिकाबाट दिएको साथ–सहयोगले हामीलाई अझ उत्प्रेरित बनाएको छ। सर्वदलीय सहकार्य, सामुदायिक भावना र स्थानीय जनसमुदायको सक्रिय सहभागिताले यसपटकको बृहत् शिवपुराण महायज्ञ जलेश्वर क्षेत्र विकासको नयाँ अध्याय बन्नेछ भन्ने ठूलो विश्वास लिएको छु,” अध्यक्ष आचार्यले भनुभयो।
रिब्दीकोट गाउँपालिकाले जलेश्वर क्षेत्रलाई धार्मिक, सांस्कृतिक तथा पर्यटकीय दृष्टिले दीर्घकालीन रूपमा विकसित गर्ने लक्ष्यसमेत महायज्ञमार्फत प्रष्ट भएको जनाउँदै “जलेश्वर जस्ता ऐतिहासिक तथा धार्मिक धरोहरको संरक्षण, प्रचारप्रसार र सुव्यवस्थित विकास गाउँपालिकाको प्राथमिकतामा छ। महायज्ञले स्थानीय स्तरमा मात्र होइन, प्रदेश र राष्ट्रिय तहमा पनि जलेश्वर क्षेत्रको पहिचान मजबुत बनाउनेछ भन्नेमा पालिकाले विश्वास लिएको सुचना प्रविधि अधिकृत सुदिप पौडेलले बताउनु भयो ।
सम्बन्धित खवर
