पाल्पा । खेलकुदमार्फत विद्यार्थीको क्षमता, अनुशासन र प्रतिस्पर्धात्मक भावना अभिवृद्धि गर्ने उद्देश्यसहित माथागढी गाउँपालिकामा सातौँ राष्ट्रपति रनिङ शिल्ड प्रतियोगिता सुरु भएको छ। यस आर्थिक वर्षमा पाल्पाका दश स्थानीय तहमध्ये सबैभन्दा पहिले प्रतियोगिता सञ्चालन गरेर माथागढी गाउँपालिकाले खेलकुदप्रति देखाएको चासो र सक्रियता विशेष चर्चा योग्य बनेको छ।
सराई खेलमैदानमा आयोजित उद्घाटन समारोहमा स्थानीय तहका जनप्रतिनिधिदेखि प्रदेशस्तरीय नेतृत्व, प्रशासन, विद्यालयका प्रमुख, शिक्षक तथा विद्यार्थी खेलाडीहरूको उत्साहपूर्ण उपस्थिति रहेको थियो। झण्डावन्दन, मार्चपास, स्वागत–सांस्कृतिक प्रस्तुति र खेलाडीहरूको आकर्षक लाइनअपसँगै सुरु भएको कार्यक्रमले स्थानीय स्तरमै उच्चस्तरको खेल प्रतियोगिताको वातावरण सृजना गरेको थियो।
प्रतियोगिताको औपचारिक उद्घाटन लुम्बिनी प्रदेशका स्वास्थ्यमन्त्री खेमबहादुर सारुले गर्नुभयो। उद्घाटन गर्दै मन्त्री सारुले खेलकुदलाई स्थानीय शासन र मानव विकासको महत्वपूर्ण आधारका रूपमा व्याख्या गर्दै, “समुदायमा सहकार्य, स्वास्थ्य र नेतृत्व विकासका लागि खेलकुद अनिवार्य हैसियतमा स्थापित हुनुपर्छ, सामाजिक समृद्धि र स्वस्थ समाज निर्माणको आधारस्तम्भका रूपमा व्याख्या गर्दै खेल क्षेत्रलाई दीर्घकालीन दृष्टिकोणसहित अघि बढाउनुपर्ने बताउनुभयो ।
प्रदेश सरकारले खेलकुद संरचनाको विकास, खेलाडी प्रोत्साहन तथा प्रतियोगिताको स्तरोन्नतिका लागि निरन्तर बजेट विनियोजन गरिरहेको मन्त्री सारुले जानकारी दिनुभयो। उहाँका अनुसार स्थानीय तहसँग सहकार्य गर्दै प्रदेश सरकारले आवश्यकतानुसार थप सहयोगका कार्यक्रमहरूसमेत अघि बढाउनेछ।
प्रतियोगितामा छात्र–छात्राबीच एथलेटिक्स, भलिबल, कबड्डीसहितका विभिन्न खेल विधामा प्रतिस्पर्धा हुनेछ। प्रतियोगितामा प्रथम बन्ने खेलाडी तथा टोली जिल्ला स्तरीय राष्ट्रपति रनिङ शिल्ड प्रतियोगितामा सहभागी हुने शिक्षा शाखाले जनाएको छ।
कार्यक्रममा प्रमुख जिल्ला अधिकारी विनु बज्राचार्य कुँवरले खेलकुदले विद्यार्थीलाई शारीरिक, मानसिक तथा सामाजिक रूपमा परिपक्व बनाउने भएकाले यस क्षेत्रमा लगानी बढाउनु आवश्यक रहेको टिप्पणी गर्नुभयो। उहाँले स्वस्थ प्रतिस्पर्धा र मेहनतको भावनासहित खेल मैदानमा उत्रिन सबै खेलाडीलाई शुभकामना दिनुभयो।
गाउँपालिका अध्यक्ष यमबहादुर चिदीले पछिल्ला वर्षहरूमा स्थानीय तहमा खेलकुदप्रति चासो तथा क्रियाशीलता बढ्दै गएको उल्लेख गर्दै, “खेलकुद नै भविष्य निर्माणको माध्यम हो। त्यसैले साना उमेरदेखि नै विद्यार्थीलाई प्रोत्साहन दिने उद्देश्यले राष्ट्रपति रनिङ शिल्डलाई व्यवस्थित ढंगले सञ्चालन गरेका हौं,” भन्नुभयो। उहाँले यस वर्ष सुविधा, व्यवस्थापन तथा प्रतिस्पर्धात्मक गुणस्तरमा थप सुधार गरेर प्रतियोगिता सञ्चालन गरिएको जानकारी दिनुभयो।
सो अवसरमा गाउँपालिका उपाध्यक्ष विष्णुमाया लुङ्चे, वडा नं. १ का वडाध्यक्ष राजकुमार पन्थी, वडा नं. ३ का वडाध्यक्ष तेजबहादुर घर्तीमगर, नेपाल पत्रकार महासंघ पाल्पाका कोषाध्यक्ष विजयकुमार बौडेल, दिव्यज्योति माध्यमिक विद्यालयका निमित्त प्रधानाध्यापक लोकेन्द्र थापा लगायत वक्ताले खेलकुदमा अनुशासन, समर्पण र स्वच्छ प्रतिस्पर्धाको संस्कृति आवश्यक रहेकोमा जोड दिएका थिए। उनीहरूले प्रतियोगिताबाटै उत्कृष्ट प्रतिभा पहिचान गरी जिल्ला तथा प्रदेशस्तरमा उत्कृष्ट प्रदर्शन गर्न प्रेरित गरे।
सराई खेलमैदानमा सञ्चालन भइरहेको प्रतियोगिता तीन दिनसम्म चल्नेछ। मंसिर २० गते समापन हुने कार्यक्रममा विभिन्न खेल विधामा स्वर्ण, रजत र कास्य पदकका लागि प्रतिस्पर्धा हुनेछ। प्रतियोगितामा पालिकाभित्रका १८ विद्यालयका विद्यार्थी खेलाडीको सहभागी रहेको शिक्षा शाखा प्रमुख प्रकाश पाठकले जानकारी दिनुभयो।
सम्बन्धित खवर
