पाल्पा । रिब्दीकोट गाउँपालिका पाल्पाको आयोजनामा “उपाध्यक्षसँग विद्यालय कार्यक्रम” अन्तर्गत “अभिभावक शिक्षा तथा असल अभिभावक कला कार्यक्रम” आजदेखि वडा नं. ४ स्थित भैरव जनता माध्यमिक विद्यालय बाट औपचारिक रूपमा सुरु भएको छ।

शिक्षा क्षेत्रको गुणस्तरीय विकास, विद्यार्थीको सर्वाङ्गीण क्षमता अभिवृद्धि तथा विद्यालय, अभिभावक र समुदायबीचको सम्बन्धलाई अझ प्रभावकारी, जिम्मेवार र समन्वयात्मक बनाउने उद्देश्यका साथ सञ्चालन गरिएको उक्त कार्यक्रममा वडा नं. ४ अन्तर्गतका भैरव जनता माध्यमिक विद्यालय, महेन्द्र जनता प्राथमिक विद्यालय तथा कालिका प्राथमिक विद्यालयका अभिभावक, शिक्षक, विद्यालय व्यवस्थापन समितिका पदाधिकारी, प्रधानाध्यापक, जनप्रतिनिधि, पालिका कर्मचारी तथा पत्रकार तथा सरोकारवालासहित करिब १३० जनाको उल्लेखनीय सहभागिता रहेको थियो।

कार्यक्रममा स्वागत मन्तव्य राख्दै शिक्षा शाखा प्रमुख राजाराम भाटले विद्यालय, शिक्षक र अभिभावकबीचको सम्बन्धलाई अझ प्रभावकारी बनाउँदै विद्यार्थीको सिकाइ उपलब्धि वृद्धि गर्ने उद्देश्यले कार्यक्रम आयोजना गरिएको जानकारी दिनुभयो। उहाँले विद्यालयमा गुणस्तरीय शिक्षा प्रदान गर्न शिक्षकको मेहनतसँगै अभिभावकको सक्रिय भूमिका पनि उत्तिकै आवश्यक रहेको बताउनुभयो।उहाँले पछिल्लो समय बालबालिकामा मोबाइल, इन्टरनेट तथा सामाजिक सञ्जालको अत्यधिक प्रयोगका कारण अध्ययनप्रतिको रुचि घट्ने, अनुशासनमा समस्या आउने तथा सामाजिक व्यवहारमा परिवर्तन देखिने जस्ता चुनौतीहरू बढ्दै गएको उल्लेख गर्दै अभिभावकलाई समयानुकूल सचेत हुन आग्रह गर्नुभयो। साथै विद्यालय सुधारका लागि शिक्षक, अभिभावक, विद्यालय व्यवस्थापन समिति तथा स्थानीय तहबीच सहकार्य, समन्वय र सकारात्मक सोच आवश्यक रहेको धारणा राख्नुभयो।

भैरव जनता माध्यमिक विद्यालयका विद्यालय व्यवस्थापन समितिका अध्यक्ष मेगराज शर्माले विद्यालयमा देखिने सम्पूर्ण कमीकमजोरीको दोष शिक्षकलाई मात्र दिने प्रवृत्ति अन्त्य हुनुपर्ने बताउनुभयो। उहाँले विद्यालय सुधार शिक्षकको मात्र नभई अभिभावक, समुदाय, विद्यालय व्यवस्थापन समिति तथा स्थानीय सरकार सबैको साझा दायित्व भएको उल्लेख गर्दै सबै पक्षले सकारात्मक भूमिका निर्वाह गर्नुपर्ने धारणा व्यक्त गर्नुभयो।उहाँले अभिभावकले बालबालिकाको नियमित पढाइ, गृहकार्य, विद्यालय उपस्थिती तथा व्यवहारप्रति चासो दिनुपर्ने बताउँदै घरमै अध्ययनको उचित वातावरण सिर्जना गर्नुपर्नेमा जोड दिनुभयो ।

त्यसैगरी वडा नं. ४ का वडा   अध्यक्ष सोम बहादुर कार्कीले विद्यालय सुधारका लागि सबै पक्ष एकजुट हुनुपर्ने बताउनुभयो। उहाँले प्रत्येक व्यक्तिले आफ्नो जिम्मेवारी इमान्दारीपूर्वक निर्वाह गरेमा मात्र विद्यालयमा गुणस्तरीय पठनपाठन सम्भव हुने र त्यसबाट असल विद्यालय, सक्षम विद्यार्थी तथा सभ्य समाज निर्माण हुने धारणा व्यक्त गर्नुभयो। समुदायले विद्यालयलाई आफ्नै संस्था सम्झेर सहयोग गर्नुपर्ने, बालबालिकाको नियमित विद्यालय उपस्थिती सुनिश्चित गर्नुपर्ने तथा शिक्षालाई व्यवहारिक र जीवनोपयोगी बनाउन सबैले ध्यान दिनुपर्ने अध्यक्ष  कार्कीको भनाई रहेको थियो ।

कार्यक्रममा निमित्त प्रमुख प्रशासकीय अधिकृत रुकलाल भट्टराईले अभिभावक र विद्यालयबीचको सम्बन्ध सुदृढ हुन सकेमा मात्र विद्यार्थीमा सकारात्मक परिवर्तन सम्भव हुने बताउनुभयो। उहाँले बालबालिकाको व्यवहार, अनुशासन, अध्ययनशीलता तथा नैतिक आचरणमा अभिभावकको प्रत्यक्ष प्रभाव पर्ने भएकाले अभिभावक थप जिम्मेवार र सचेत बन्नुपर्ने धारणा राख्नुभयो।

कार्यक्रमका अध्यक्ष तथा गाउँपालिका उपाध्यक्ष कान्ता अधिकारीले विद्यालयमा गुणस्तरीय सुधार ल्याउने, विद्यार्थी भर्नादर वृद्धि गर्ने, सिकाइ उपलब्धि बढाउने तथा अभिभावकलाई थप जिम्मेवार र सचेत बनाउने उद्देश्यले कार्यक्रम सञ्चालन गरिएको बताउनुभयो।उहाँले असल अभिभावकत्वको विकासले बालबालिकाको व्यवहार, अध्ययनशीलता, अनुशासन, आत्मविश्वास तथा भविष्य निर्माणमा प्रत्यक्ष प्रभाव पार्ने भएकाले यस्ता कार्यक्रम अत्यन्त आवश्यक रहेको बताउनुभयो। उहाँले पछिल्लो समय प्रविधिको बढ्दो प्रयोगसँगै बालबालिकामा देखिन थालेका सामाजिक तथा मनोवैज्ञानिक चुनौतीप्रति अभिभावक सचेत हुनुपर्नेमा जोड दिँदै बालबालिकालाई सही मार्गदर्शन, माया, प्रेरणा र सकारात्मक वातावरण दिनुपर्ने धारणा व्यक्त गर्नुभयो।

उपाध्यक्ष अधिकारीले गाउँपालिकाले आगामी दिनमा पनि “उपाध्यक्षसँग विद्यालय कार्यक्रम” अन्तर्गत विभिन्न विद्यालयमा यस्ता अभिमुखीकरण, अन्तरक्रिया तथा चेतनामूलक कार्यक्रम सञ्चालन गर्दै जाने जानकारी दिनुभयो।  शिक्षामा सबै पक्षको साझा सहकार्यबाट मात्र समृद्ध समाज निर्माण सम्भव हुने उल्लेख गर्दै “विद्यालय सुधार अभियानमा सबैको साथ, सहयोग र समन्वय आवश्यक रहेको” बताउनुभयो।

कार्यक्रमका प्रमुख अतिथि तथा गाउँपालिका अध्यक्ष नारायण बहादुर कार्कीले गाउँपालिकाले शिक्षा क्षेत्रलाई विशेष प्राथमिकतामा राखी विद्यालयको भौतिक पूर्वाधार विकास, प्रविधिमैत्री शिक्षण सिकाइ, शिक्षक क्षमता अभिवृद्धि, बालमैत्री वातावरण निर्माण तथा सामुदायिक विद्यालयप्रतिको विश्वास बढाउने गरी विभिन्न कार्यक्रम सञ्चालन गरिरहेको जानकारी दिनुभयो । उहाँले “असल अभिभावकले नै असल विद्यार्थी र असल समाज निर्माण गर्न सक्छ” भन्दै अभिभावकलाई आफ्ना बालबालिकाको पढाइ, व्यवहार, अनुशासन र मनोविज्ञानप्रति सचेत र जिम्मेवार बन्न आग्रह गर्नुभयो।

उहाँले शिक्षालाई केवल परीक्षामुखी नभई व्यवहारिक, नैतिक तथा जीवनोपयोगी बनाउन आवश्यक रहेको उल्लेख गर्दै स्थानीय सरकारले शिक्षा क्षेत्र सुधारका लागि दीर्घकालीन योजना बनाएर काम गरिरहेको जानकारी दिनुभयो।

शिक्षालाई केवल विद्यालयको जिम्मेवारीका रूपमा नभई अभिभावक, समुदाय, शिक्षक र स्थानीय सरकार सबैको साझा दायित्वका रूपमा बुझ्नुपर्ने बताउनुभयो । बालबालिकाको भविष्य निर्माणमा अभिभावकको भूमिका अत्यन्त महत्वपूर्ण हुने उल्लेख गर्दै उहाँले घरको वातावरण, अभिभावकको व्यवहार, नैतिक संस्कार तथा विद्यालयको सिकाइ वातावरणले विद्यार्थीको व्यक्तित्व विकासमा प्रत्यक्ष प्रभाव पार्ने कार्कीले बताउनुभयो।

कार्यक्रममा सहभागी भैरव जनता माध्यमिक विद्यालयका प्रधानाध्यापक सुरेश गौतम,वडा न ४ का वडा सचिव देवा पोखरेल, टिकाराम ढकाल, पत्रकार सीता गौतम तथा विद्यार्थी प्रतिनिधि प्रिया भण्डारी लगायतले पालिकाले पहिलो पटक यति प्रभावकारी, व्यवहारिक तथा सचेतनामूलक शैक्षिक कार्यक्रम सञ्चालन गरेको भन्दै गाउँपालिकाप्रति धन्यवाद व्यक्त गर्नुभएको थियो। सहभागीहरूले यस्ता कार्यक्रमले विद्यालय, अभिभावक र समुदायबीचको सम्बन्धलाई अझ मजबुत बनाउनुका साथै बालबालिकाको समग्र विकासमा महत्वपूर्ण योगदान पुग्ने विश्वास व्यक्त गरेका थिए।

कार्यक्रममा सहभागी अभिभावकहरूले पनि आफ्ना अनुभव, समस्या तथा सुझाव प्रस्तुत गर्दै यस्ता कार्यक्रमले आफूहरूलाई बालबालिकाको व्यवहार, पढाइ तथा भविष्यप्रति थप जिम्मेवार बन्न प्रेरणा मिलेको बताएका थिए।

गाउँपालिकाले शिक्षा क्षेत्रको सुधार, सामुदायिक विद्यालयप्रतिको विश्वास अभिवृद्धि, गुणस्तरीय शिक्षाको सुनिश्चितता तथा विद्यार्थीको समग्र व्यक्तित्व विकासका लागि आगामी दिनमा पनि यस्ता चेतनामूलक, सहभागितामूलक तथा व्यवहारिक कार्यक्रमलाई निरन्तरता दिने जनाएको छ। उपाध्यक्षसँग विद्यालय कार्यक्रम” अन्तर्गत सञ्चालन भइरहेको “अभिभावक शिक्षा तथा असल अभिभावक कला कार्यक्रम” आजदेखि आगामी जेठ ४ गतेसम्म गाउँपालिकाका सबै वडामा सञ्चालन हुने जनाएको छ। गाउँपालिकाका अनुसार कार्यक्रम अन्तर्गत भोलि वडा नं. १ मा कार्यक्रम आयोजना गरिनेछ। यस्ता कार्यक्रममार्फत विद्यालय, अभिभावक र समुदायबीच समन्वय तथा सहकार्य अभिवृद्धि गर्दै शिक्षा क्षेत्रको गुणस्तर सुधारमा थप टेवा पुग्ने विश्वास गाउँपालिकाले लिएको छ।

गाउँपालिकाका अध्यक्ष नारायण बहादुर कार्कीको प्रमुख आतिथ्यता, उपाध्यक्ष कान्ता अधिकारीको अध्यक्षता तथा शिक्षा शाखा प्रमुख राजाराम भाट को स्वागत मन्तव्यसँगै उद्घाटन कार्यक्रम सम्पन्न भएको थियो  ।

कार्यक्रममा आवास सिकाइ कार्यक्रमको अभियानता तथा सहजकर्ता अर्जुन भट्टले सहजीकरण गर्नुभएको थियो भने सहजीकरण नवकिरण नेपाल, तानसेन–पाल्पाले गरेको थियो। सहजीकरणका क्रममा अभिभावकको भूमिका, बालमैत्री व्यवहार, सकारात्मक सोच, बालमनोविज्ञान, अध्ययनप्रति प्रेरणा, अनुशासन, नैतिक शिक्षा तथा जिम्मेवार अभिभावकत्व सम्बन्धी विषयमा अन्तरक्रियात्मक छलफल गरिएको थियो।