पाल्पा —नेपाली कम्युनिस्ट पार्टी (नेकपा) ले देशभरि सञ्चालन गरिरहेको ‘एकता सन्देश अभियान’ अन्तर्गत पाल्पामा आयोजना हुने भव्य ‘एकता सन्देश सभा’का लागि तयारी पूरा भएको जनाएको छ। जिल्ला कमिटीका अनुसार आगामी मंसिर २३ गते तानसेनमा हुने कार्यक्रमलाई ऐतिहासिक बनाउने लक्ष्य लिइएको छ।
जिल्ला कमिटीले निरन्तर रूपमा सभा स्थल व्यवस्थापन, सुरक्षा समन्वय, प्रचार–प्रसार तथा कार्यकर्ता परिचालन लगायतका गतिविधि गरिरहेको बताएको छ। कमिटीका सदस्यहरूका भनाइअनुसार पाल्पामा हुन लागेको यो सभा पार्टी एकताको दिशामा महत्वपूर्ण मोडका रूपमा लिने तयारी गरिएको छ।
सभामा नेकपाका शीर्ष तहका नेताहरूले देशको वर्तमान राजनीतिक गतिशीलता, वैचारिक द्वन्द्व र बहसका कारण छरिएका कम्युनिस्ट धाराहरूलाई एक दिशा दिने आवश्यकता, तथा संगठित, अनुशासित र वैकल्पिक शक्तिको निर्माण सम्बन्धी कार्ययोजनाबारे विस्तृत रूपमा प्रस्तुति दिनेछन्।
नेकपाका नेता राजेन्द्र विश्वकर्माले तयारीको अवस्था स्पष्ट पार्दै भने,“हामीले एकता सन्देश सभालाई व्यवस्थित र भव्य बनाउने लक्ष्यसहित तयारी पूरा गरिसकेका छौँ। पाल्पाबाट उठ्ने एक स्वरले देशभरि कम्युनिस्ट आन्दोलनलाई नयाँ ऊर्जासहित अघि बढाउने अपेक्षा राखेका छौँ।”उनका अनुसार जिल्ला समन्वय समिती, वडास्तरका संरचना तथा जनसंगठनहरू सबैलाई कार्यक्रम सफल बनाउन लागि परिएको छ।
देशैभरि चलाइएको पार्टी अभियानको मुख्य उद्देश्य विभिन्न समूह, संगठन र धारमा छरिएका कम्युनिस्ट शक्तिहरूलाई एउटै मंचमा ल्याई राष्ट्रिय राजनीति सम्हाल्न सक्षम बलियो विकल्प निर्माण गर्ने रहेको बताइएको छ। नेतृत्वले अहिलेको राजनीतिक अनिश्चितता, आर्थिक चुनौती र शासन प्रणालीका प्रश्नसम्बन्धी मुद्दाहरूलाई समेत सभामा गम्भीरतापूर्वक उठाउने तयारी गरेको छ।
जिल्लाभरिका कार्यकर्तालाई सक्रिय सहभागी हुन, स्थानीय टोल–टोलबाट जनसमुदाय उपस्थित गराउन तथा पार्टी विचारधारालाई जनस्तरमा विस्तार गर्न अपिल गरिएको छ। नेकपाका नेता अशोक कुमार शाहीले कार्यक्रमबारे जानकारी दिँदै भने,“दशैवटा स्थानीय तहका सबै संरचनालाई सक्रिय बनाइएको छ। पार्टीभित्रको आत्मविश्वास, संगठन विस्तार र भावी रणनीतिलाई जनता समक्ष स्पष्ट रूपमा प्रस्तुत गर्ने अवसरका रूपमा हामी यस सभालाई लिएका छौँ।”
पार्टीका अनुसार पाल्पामा हुने यो सभा एकताको सन्देशलाई राष्ट्रिय स्तरमा प्रतिध्वनि गराउने, वैचारिक स्पष्टता प्रदान गर्ने र आगामी राजनीतिक दिशानिर्देशन तय गर्ने महत्वपूर्ण अवसरका रूपमा रहने बताईएको छ ।
