पाल्पा, ।
पाल्पा उद्योग वाणिज्य संघको ७१औं वार्षिक साधारणसभा भव्य रुपमा सम्पन्न भएको छ भने सोही अवसरमा संघको १७औं अधिवेशनको औपचारिक सुरुवात गरिएको छ । कार्यक्रमको उद्घाटन नेपाल उद्योग वाणिज्य महासंघका एसोसिएट उपाध्यक्ष हेमराज ढकालले गर्नुभयो ।
उद्घाटन समारोहलाई सम्बोधन गर्दै उपाध्यक्ष ढकालले नेपालको समृद्धि र विकासमा निजी क्षेत्रको भूमिका अत्यन्तै महत्वपूर्ण रहेको बताउँदै भने, “निजी क्षेत्रको योगदान विना देश विकासको बाटोमा अघि बढ्न सक्दैन । सरकारले निजी क्षेत्रको मनोबल जोगाउन तत्काल ठोस कदम चाल्नुपर्छ ।”
उहाँले पछिल्ला राजनीतिक आन्दोलनका नाममा निजी क्षेत्रका व्यवसायीहरू निरन्तर शिकार बन्नु दुःखद रहेको बताउनुभयो । भदौ २३ र २४ गतेको आन्दोलनबाट देशभरका व्यवसायी तहसनहस भएको उल्लेख गर्दै ढकालले नाम चलेका उद्योग र पसलहरू खरानीमा परिणत भएको, जसले व्यावसायिक समुदायको आत्मबल कमजोर पारेको बताउनुभयो ।
साधारणसभामा सहभागी उद्योगी व्यवसायीहरूले पनि सरकारले स्वदेशी व्यवसायीहरूलाई विश्वासमा लिन नसके देशको आर्थिक अवस्था थप जटिल हुने चेतावनी दिए । हालैका आगजनी, लुटपाट र तोडफोडका घटनाले निजी क्षेत्र चिन्तित रहेको भन्दै उनीहरूले दोषीलाई तत्काल कानुनी कारबाही गर्न माग गरे । “यदि सरकारले यस्ता अपराधीलाई नियन्त्रणमा लिएर कारबाही गरेन भने, नेपालका व्यवसायीहरू पलायन हुन बाध्य हुनेछन्,” सहभागी व्यवसायीहरूको भनाइ थियो ।
कार्यक्रममा राष्ट्रियसभा सदस्य राजेन्द्रलक्ष्मी गैरे, संविधानसभा सदस्य नारायणी शर्मा, पूर्व उद्योगमन्त्री सोमप्रसाद पाण्डे, प्रदेशसभा सदस्य विरबहादुर राना, पूर्व सांसद यादवबहादुर रायमाझी, नेपाल उद्योग वाणिज्य महासंघका केन्द्रीय सदस्य मोहनप्रसाद श्रेष्ठ, तानसेन नगरपालिकाका नगर प्रमुख सन्तोषलाल श्रेष्ठ, नेपाली काँग्रेस पाल्पाका उपसभापति झपेन्द्र गहिरे, नेकपा एमालेका उपाध्यक्ष विमल काफ्ले, नेकपा माओवादी केन्द्रका इन्चार्ज नेत्र पाण्डे, राष्ट्रिय स्वतन्त्र पार्टीका कार्यवाहक अध्यक्ष सुमन गैरे, राष्ट्रिय प्रजातन्त्र पार्टीका अध्यक्ष डुलबहादुर कुवँर, नेकपा एकीकृत समाजवादीका अध्यक्ष अशोककुमार शाही, राष्ट्रिय जनमोर्चाकी सह–सचिव नर्मती सिंजाली, पत्रकार महासंघ पाल्पाका अध्यक्ष कमलराज तिमिल्सेना, सिन्धुली उद्योग वाणिज्य संघका अध्यक्ष अर्जुनकुमार श्रेष्ठ र पाल्पा व्यापार संघका महासचिव तुलबहादुर अधिकारीलगायतका अतिथिहरूले शुभकामना मन्तव्य दिएका थिए ।
वक्ताहरूले पाल्पालाई चलायमान बनाउन नयाँ ढंगका उद्योग, व्यवसाय र पर्यटनमुखी पूर्वाधार निर्माणमा जोड दिए । उनीहरूले निजी क्षेत्र, स्थानीय निकाय र सरकारबीच सहकार्यको नयाँ अध्याय सुरू गर्नुपर्नेमा जोड दिए ।
कार्यक्रममा संघका महासचिव समिरमान सिंहले वार्षिक प्रतिवेदन प्रस्तुत गर्नुभयो । सो अवसरमा विभिन्न अक्षयकोषदाता र छात्रवृत्ति प्राप्तकर्ताहरूलाई सम्मान गरिएको थियो ।
संघका अध्यक्ष शैलेन्द्र भट्टराईको अध्यक्षतामा सम्पन्न साधारणसभाको सञ्चालन महासचिव सिंहले गर्नुभएको थियो । अब १७औं अधिवेशनबाट पाल्पा उद्योग वाणिज्य संघको नयाँ नेतृत्व चयन हुने छ ।
