पाल्पा, २५ असोज
डुम्रे दुग्ध कृषि सहकारी संस्था लिमिटेड, तिनाउ–६ पाल्पाको ३२औं वार्षिक साधारणसभा सम्पन्न भएको छ ।
कार्यक्रममा सहकारीका अध्यक्ष दुर्गा बहादुर खाण ठकुरीले आर्थिक वर्ष २०८०/८१ को प्रतिवेदन प्रस्तुत गर्दै सहकारीले उत्पादन, संकलन र वितरण प्रणालीमा सुधार गर्दै किसानहरूलाई लाभान्वित गर्न सफल भएको बताए। उनका अनुसार सहकारीले सदस्य कृषकहरूलाई यस वर्ष ५५ हजार रुपैयाँसम्मको बोनस वितरण गरेको छ।
अध्यक्ष दुर्गा बहादुर खाण ठकुरीले सहकारीलाई अझ सुदृढ र किसानमुखी बनाउनका लागि सबैको निरन्तर सहयोग आवश्यक रहेको बताए।
वार्षिक साधारणसभामा संस्थाका कृषक लगानीकर्तालाई लगानीको १५ प्रतिशत लाभांश वितरण गरिएको छ । कृषकहरूले ५५ हजारदेखि १ हजार रुपैयाँसम्म वार्षिक बोनस प्राप्त गरेका छन् ।
साधारणसभामा कृषकहरूलाई फूलमाला र सम्मानका साथ लाभांश वितरण गरिएको थियो । हाल सहकारीमा ५ सय जना कृषक सदस्यहरू आवद्ध छन्, जसमा १ सय ६४ महिला र २ सय २३ पुरुष शेयर सदस्य रहेका छन् ।
गत आर्थिक वर्ष २०८१/८२ मा सहकारीले ९ लाख ४६ हजार ७ सय ३० लिटर दूध कारोबार गरेको र ३४ करोड १३ लाख ८८ हजार ६ सय ६४ रुपैयाँ बराबरको आर्थिक कारोबार गरेको जानकारी लेखा समितिले दिएको छ । सहकारीको संस्थागत पूँजी ५ करोड १९ लाख ५६ हजार ६ सय २० रुपैयाँ, जगेडा कोषमा ७८ लाख ५१ हजार ८ सय ८ रुपैयाँ, शेयर पूँजीमा ५३ लाख १३ हजार १ सय रुपैयाँ, र अन्य कोषमा ८ लाख २ हजार ५७ रुपैयाँ रहेको छ ।
संस्थाले पशुपालन व्यवसायसँग सम्बन्धित घाँसको बीउ, दाना, ब्रान, औषधि, भिटामिन, कृत्रिम गर्भाधान र पशु उपचार सेवा निरन्तर सञ्चालन गर्दै आएको छ । साथै, सदस्य कृषकको गाई–भैंसी सुत्केरी हुँदा प्रति पशु १ हजार २ सय रुपैयाँ पोषण सहयोग दिँदै आएको छ । नयाँ पशु खरिद गर्दा निःशुल्क ढुवानी सेवा पनि उपलब्ध गराइन्छ ।
हाल संस्थाले तानसेन बजारमा १, मिशनमा १ डेरी र डुम्रेमा एग्रोभेट पसल सञ्चालन गर्दै दूध बिक्री वितरण सेवा दिइरहेको छ । वर्षायाममा दूध उत्पादन अत्यधिक हुने भएकाले सहकारीले आगामी दिनमा बुटवल राजमार्ग क्षेत्रमा मिठाई, चिया, लस्सी र दुधजन्य परिकारको पसल सञ्चालन गर्ने, छुर्पी उत्पादन गर्ने र दूधका परिकारहरूलाई विविधिकरण गर्ने योजना सार्वजनिक गरेको छ ।
सहकारीले मुक्तिनाथ विकास बैंकबाट २ करोड रुपैयाँ ऋण लिएर कृषकहरूलाई सहुलियत दरमा लगानी गर्दै आएको छ । साथै, कृषकहरूको ४ लाख ४ हजार ७ सय २० रुपैयाँ बराबरको निःशुल्क पशु बीमा गरिएको छ, जसबाट वार्षिक ४० लाख रुपैयाँभन्दा बढी क्षतिपूर्ति कृषकहरूले पाएका छन् ।
हेफर नेपालसँगको सहकार्यमा सहकारीले कोरियाबाट आयात गरिएको उच्च नश्लका गाईको सिमेन प्रयोग गरेर १० वटा बाच्छी उत्पादन गरेको छ । गाईमा देखिने मिल्क फिभर रोग नियन्त्रणका लागि “काउ लिफ्ट” खरिद गर्ने योजना पनि साधारणसभामा प्रस्तुत गरिएको छ ।
हाल सहकारीले दैनिक ३ हजारदेखि ४ हजार लिटर दूध खरिद–विक्रि गर्दै आएको छ र कृषकका १६ जना छोरा–छोरीलाई प्रत्यक्ष रोजगारी प्रदान गरेको छ । सहकारीमा आवद्ध कृषकहरूले दूधको उचित मूल्य पाएको, सरकारी अनुदान र संस्थाको मुनाफा दुबै लाभ पाउने भएकाले तानसेन, रिब्दीकोट, तिनाउ, माथागढी र बगनासकाली क्षेत्रका कृषकहरू सहकारीमा आवद्ध हुन थालेका छन् ।
साधारणसभामा तिनाउ गाउँपालिका–६ का वडा अध्यक्ष टोम बहादुर पुनले डुम्रे दुग्ध सहकारीलाई नेपालकै नमुना कृषि सहकारी संस्था भन्दै, यसले पशुपालन र कृषि मार्फत रोजगारी र आयआर्जन बढाउन ठूलो योगदान दिएको बताए । गाउँपालिकाले यस वर्ष डुम्रे दुग्ध कृषकहरूको प्रोत्साहनका लागि ५ लाख ९८ हजार रुपैयाँ अनुदान उपलब्ध गराएको जानकारी पनि उनले दिए ।
जिल्ला दुग्ध उत्पादक सहकारी संघका अध्यक्ष रामजी घिमिरे तथा शेयर सदस्य रामप्रसाद पोखरेल, सिता जिसी लगायतले सहकारीको योगदानको प्रशंसा गर्दै, आगामी दिनमा दूधको विविधिकरण र गुणस्तरी उत्पादनमा जोड दिनुपर्ने सुझाव दिएका थिए ।
कार्यक्रममा लेखा सुपरिवेक्षण समिती संयोजक धनबहादुर कार्कीले ३४ करोड बराबरको आय–व्यय विवरण सार्वजनिक गर्दै ९ लाख रुपैयाँ खुद नाफा रहेको जानकारी दिए ।
कार्यक्रममा स्थानीय जनप्रतिनिधि, सहकारी संघ–संस्थाका प्रतिनिधि, दुग्ध उत्पादक किसान, समाजसेवी तथा सञ्चारकर्मीहरूको उल्लेखनीय उपस्थिति रहेको थियो।
कार्यक्रम अध्यक्ष दुर्गा बहादुर खाण ठकुरीको अध्यक्षतामा, उपाध्यक्ष शंकर प्रसाद भण्डारीको स्वागत मन्तव्य र व्यवस्थापक गोपाल जिसीको सञ्चालनमा सम्पन्न भएको थियो ।
सम्बन्धित खवर
