पाल्पा । रिब्दीकोट गाउँपालिकाले सामाजिक सुरक्षा र स्वास्थ्यको पहुँच सबैसम्म पुगोस् भन्ने उद्देश्यका साथ पहिलो चरण अन्तर्गत अति विपन्न, दलित तथा “ग” वर्गका अपाङ्ग परिवारका सदस्यहरूको निःशुल्क स्वास्थ्य बीमा सम्पन्न गरेको छ। गाउँपालिकाका ८ वटै वडाका ५१९ घरपरिवारका नागरिकको कुल रु.१९ लाख ६२ हजार ४०० बराबरको स्वास्थ्य बीमा गरिएको हो। गाउँपालिकाले “अध्यक्षसँग स्वास्थ्य बीमा कार्यक्रम” अन्तर्गत आफ्ना नियमित सामाजिक उत्तरदायित्वका रूपमा अघि सारेको हो।
कार्यक्रम गाउँपालिकाको चालू आ.व. २०८२/०८३ को स्वीकृत “अध्यक्षसँग स्वास्थ्य बीमा कार्यक्रम” अन्तर्गत सञ्चालन गरिएको हो। कार्यक्रम गाउँपालिकाका सबै वडामा सम्बन्धित वडा अध्यक्षज्यूहरूको अध्यक्षता र गाउँपालिका अध्यक्ष नारायण बहादुर काकी ज्यूको प्रमुख आतिथ्यता तथा उपाध्यक्ष कान्ता अधिकारी ज्यूको विशिष्ट आतिथ्यतामा सम्पन्न भएको थियो। कार्यक्रममा सम्बन्धित वडा अध्यक्ष ,वडा सदस्यहरु,प्रमुख प्रशासकीय अधिकृत सुरेश भुषाल, स्वास्थ्य शाखा प्रमुख,बीमा कार्यान्वयन समिति सदस्य सचिव तथा स्वास्थ्य शाखा प्रमुख सुनिल सुनिल अधिकारी, समितिका सदस्यहरु , जनप्रतिनिधि तथा लक्षित वर्गका नागरिकहरूको उत्साहजनक सहभागिता रहेको थियो।
कार्यक्रममा स्वास्थ्य शाखा प्रमुख सुनिल अधिकारीले गाउँपालिकाले सुरु गरेको यो स्वास्थ्य बीमा कार्यक्रम केवल वित्तीय सहयोग मात्र नभइ स्वास्थ्य सुरक्षा र सामाजिक न्यायको दिशातर्फको ठोस कदम रहेको रहेको बताउनु भयो । अति विपन्न, दलित र अपाङ्ग वर्गलाई बीमामा समेट्नुले गाउँपालिकाको समावेशी सोच र नागरिकप्रतिको संवेदनशीलता देखाउँछ, अधिकारीले बताउनु भयो ।बीमाले नागरिकलाइ स्वास्थ्य उपचारमा हुने खर्चको बोझ घटाउँछ नियमित स्वास्थ्य परीक्षण गर्न प्रेरित हुन्छन् र स-साना रोग समयमा उपचार सम्भव हुन्छ। यसले दीर्घकालीन रूपमा स्वस्थ समाज निर्माणमा योगदान पुर्याउनेछ अधिकारीले भन्नुभयो ।
कार्यक्रममा बोल्दै प्रमुख प्रशासकीय अधिकृत सुरेश भुषालले रिब्दीकोट गाउँपालिकाले योजनाबद्ध रूपमा तथ्यांक संकलन गरी लक्षित वर्ग पहिचान गरेको छ। यो केवल एउटा सुरुवात हो। अब बाँकी बीमा नभएका नागरिकहरूलाई पनि आगामी चरणमा समेट्ने हाम्रो तयारी रहेको बताउनु भयो । उहाँका अनुसार, बीमालाई निरन्तरता दिन गाउँपालिकाले स्थानीय स्वास्थ्य संस्थासँग सहकार्य गरेर स्थायी अभियानको रूपमा लैजाने योजना बनाएको छ। “स्वास्थ्य बीमा हरेक नागरिकको अधिकार हो भन्ने अवधारणालाई व्यवहारमा उतार्न हामी प्रतिबद्ध छौं,” उहाँले जोड दिनुभयो।
कार्यक्रममा विशिष्ट अतिथि तथा गाउँपालिका उपाध्यक्ष कान्ता अधिकारीले गाउँपालिकाले स्वास्थ्य क्षेत्रलाई विकासको आधार मानेको छ। स्वस्थ नागरिक नै समृद्ध गाउँको मेरुदण्ड हो, उपाध्यक्ष अधिकारीले भन्नुभयो ।
उहाँले अध्यक्षसँग स्वास्थ्य बीमा कार्यक्रम” अन्तर्गत सञ्चालन गरिएको “विपन्न, दलित र अपाङ्ग नागरिकका लागि निःशुल्क स्वास्थ्य बीमा गर्नु केवल सहयोग होइन, यो आत्मनिर्भर र सशक्त जीवनतर्फको यात्रा हो। हामीले सुरु गरेको यो अभियानलाई निरन्तरता दिँदै बाँकी सबै नागरिकलाई पनि बीमाको पहुँचमा ल्याउने हाम्रो दृढ प्रतिबद्धता छ।” रिब्दीकोट गाउँपालिका सोहि अनुसार अगाडी बढ्छ उहाँले थप स्पष्ट पानुभयो ।
कार्यक्रममा प्रमुख अतिथि तथा गाउँपालिका अध्यक्ष नारायण बहादुर काकीले रिब्दीकोट गाउँपालिकाले सदैव नागरिकको जीवनस्तर उकास्ने र समान अवसर दिने उद्देश्यका साथ काम गर्दै आएको छ। स्वास्थ्य बीमा कार्यक्रम हाम्रो पालिकाको एउटा फरक र उदाहरणीय पहल हो, अध्यक्ष काकीले बताउनु भयो । हामीले सुरु गरेको यो बीमा कार्यक्रमले कुनै पनि नागरिक उपचार नपाएर दुख नपाओस् भन्ने भावनालाई मूर्तरूप दिन खोजेको हो। अबको लक्ष्य भनेको प्रत्येक नागरिक स्वास्थ्य बीमाबाट लाभान्वित हुने अवस्था सिर्जना गर्नु हो।
अध्यक्ष काकीले स्वास्थ्य बीमा सेवा निरन्तर रूपमा आगामी वर्षहरूमा पनि सञ्चालन गरिने तथा हाम्रो लक्ष्य हरेक घरमा स्वास्थ्य सुरक्षा, हरेक नागरिकमा उपचारको आत्मविश्वास हो भन्नुभयो ।
स्वास्थ्यलाई शिक्षा र रोजगारीसँग जोड्दै गाउँपालिकालाई “स्वस्थ, सक्षम र आत्मनिर्भर पालिका” बनाउने दृष्टि रहेको समेत अध्यक्ष काकीले जानकारी दिनुभयो ।
रिब्दीकोट गाउँपालिकाले सुरु गरेको “अध्यक्षसँग स्वास्थ्य बीमा कार्यक्रम” केवल बीमाको औपचारिकता होइन, यो जनस्वास्थ्यको आधार र नागरिक अधिकारको अभ्यास हो। पहिलो चरणमै ५१९ जनाको बीमा सम्पन्न गरेर गाउँपालिकाले स्वास्थ्य सुरक्षाको क्षेत्रमा ठोस कदम चालेको छ।
सम्बन्धित खवर
