तानसेन । माथागढी गाउँपालिका–१, चिदीपानीस्थित अर्पिडा युवा क्लबको आयोजनामा सञ्चालित मैत्रीपूर्ण भलिबल प्रतियोगिता सम्पन्न भएको छ। स्थानीय युवा–युवतीको सहभागिता, खेलकुदप्रतिको जागरूकता तथा सामाजिक एकता प्रवर्द्धन गर्ने उद्देश्यले आयोजना गरिएको सो प्रतियोगिता पाँच दिनसम्म सञ्चालन भएको थियो।उक्त प्रतियोगितामा ३६ टिमको उल्लेखनीय सहभागिता रहँदा, प्रतिस्पर्धात्मक वातावरणमा सम्पन्न खेलबाट बिरकोट युवा क्लब प्रथम, आयोजक अर्पिडा युवा क्लब दोस्रो, तथा रमैडाडा युवा क्लब तृतीय स्थान हासिल गर्न सफल भएका छन्।
प्रतियोगिताको समापन कार्यक्रममा माथागढी गाउँपालिका–१ का वडा अध्यक्ष तथा कार्यक्रमका प्रमुख अतिथि राजकुमार पन्थीज्यूको प्रमुख आतिथ्यमा विजेता टिमहरूलाई नगद पुरस्कार, मेडल, ट्रफी र प्रमाणपत्रद्वारा सम्मान गरीएको थियो ।
प्रमुख अतिथि पन्थीले प्रतियोगिताको सफल आयोजनामा आयोजक क्लबको सक्रियता र स्थानीय युवाहरूको अभूतपूर्व सहभागिताको प्रशंसा गर्दै, “यस्ता खेलकुद कार्यक्रमले स्वास्थ्य सुदृढीकरण, खेलाडी पहिचान, युवा पुस्ताबीच आपसी भावनात्मक एकता तथा स्थानीय परिचयको प्रवर्द्धनमा उल्लेखनीय योगदान पुर्याउनेछन्,” भन्ने धारणा व्यक्त गर्नुभयो। साथै, उहाँले युवाको भावना, समुदायको आवश्यकता र अपेक्षालाई मध्यनजर गर्दै आगामी दिनमा युवामुखी कार्यक्रमहरूलाई निरन्तरता दिने प्रतिबद्धता समेत व्यक्त गर्नुभयो।
कार्यक्रममा वडा सदस्य लिला कुमारी बिक, युवा समाजसेवीहरू शेर बी.बिक, कमल गाहा, विष्णु सारु, बालकृष्ण राउत, तथा तारा बहादुर बिक लगायतको उपस्थिति रहेको थियो।
क्लबकाअध्यक्ष सारुले प्रतियोगिता सफल बनाउन सहयोग गर्ने सम्पूर्ण व्यक्तित्व, संस्था तथा सहभागी टिमप्रति आभार व्यक्त गर्दै, आगामी वर्षहरूमा पनि यस्ता कार्यक्रमलाई निरन्तरता दिने तथा विकास निर्माणमा युवा क्लबको सहभागिता अझ सशक्त बनाइने प्रतिबद्धता व्यक्त गर्नुभयो।अर्पिडा युवा क्लबको यो आयोजनाले खेलकुदको माध्यमबाट सामाजिक एकता, युवा सशक्तीकरण र समावेशी विकासतर्फ टेवा पुर्याउने विश्वास आयोजकले लिएको छ।
समापन समारोह क्लबका अध्यक्ष मिलन सारुले गर्नुभएको थियो भने कार्यक्रमको सञ्चालन मोहन सारुले गर्नुभएको थियो।
सम्बन्धित खवर
