२९ चैत, बुटवल । रुपन्देहीको मर्चवार क्षेत्रलाई स्थानीय प्रशासनले उच्च निगरानीमा राखेको छ । सीमावर्ती भारतको कोल्हुई गाउँमा कोरोना संक्रमित बिरामी भेटिएपछि प्रशासनले निगरानी बढाएको हो । रुपन्देहीको मर्चवारी गाउँपालिका १ खैराघाटबाट करिब ४ किलोमिटरको दुरी रहेको कोल्हुई क्षेत्रमा ६ जना भारतीयमा कोरोनाको संक्रमण देखिएपछि भारतसंग जोडिएको रुपन्देहीको सबै नाकाहरुमा उच्च निगरानी गरिएको प्रशासनको दावी छ ।
लकडाउनको समयमा लुकिछिपी सोही क्षेत्रबाट एकजना व्यक्ति नेपाल भित्रिएका छन् । नेपाल प्रवेश गरेका एक व्यक्तिसहित परिवारका चारै जनालाई तिलोत्तमा नगरपालिकाको क्वारेन्टाइनमा राखिएको छ ।
भारतबाट आवत जावत रोक्न र रुपन्देहीमा आउने अधिकांश तरकारी भारतको कोल्हुई क्षेत्रबाट आउने गरेकाले तरकारी व्यापारीहरुलाई आउन नदिन निगरानी उच्च बनाइएको हो ।
भैरहवा विमानस्थल दक्षिणको सीमादेखि कपिलवस्तुको सीमासम्म रहेका एउटा इलाका प्रहरी कार्यालय र १० वटा प्रहरी चौकीका गरी करिब सय जना जनपद प्रहरीलाई लकडाउन अवधिभरका लागि पूर्णतया सीमाको निगरानीमा खटाइएको रुपन्देही प्रहरी प्रमुख हेमकुमार थापाले बताए ।
‘नेपाल प्रहरीका १० वटा चौकी र एउटा इलाका प्रहरीका सबै जनशक्तिलाई पूर्णतया सीमामा आवतजावत रोक्न खटाएका छौं’ एसपी थापाले भने । यस्तै सशस्त्र प्रहरी बलले साविक संख्यामा दुई सय जना जनशक्ति थपेर सीमा क्षेत्रमा निगरानी कडा बनाएको रुपन्देहीका प्रमुख जिल्ला अधिकारी महादेव पन्थले बताए ।
भारतसंग खुल्ला सिमाना रहेको विभिन्न स्थानबाट भारतमा रोजगारीका लागि गएका नेपाली र सीमा क्षेत्रका किसानले भारतीय बजारमा किनमेलका लागि आवतजावत गर्न नछाडेकाले नेपाल प्रहरी र सशस्त्र प्रहरी बल तैनाथ गरेर निगरानी बढाइएको उनले जानकारी दिए ।
‘रुपन्देहीको दक्षिणी क्षेत्रका साना ठूला सबै नाकामा नेपाल प्रहरी र सशस्त्र प्रहरी बलको संयुक्त समन्वयमा एक प्रहरीले अर्को प्रहरीलाई देख्नसक्ने गरी आउने जाने गतिविधिलाई निगरानी शुरु गरेका छौं, भारतबाट नेपाल र नेपालबाट भारततर्फ कोही पनि जान नसक्ने गरी मर्चवारमा सुरक्षा तैनाथी बढाइएको छ ।’
प्रहरी तथा विभिन्न संघ–संस्थासंग समन्वय गरी कोरोना संक्रमण रोकथामको लागि दिनरात खटिएको मर्चवारी गाउँपालिका अध्यक्ष केशवनन्द बानियाँले बताए ।
सम्बन्धित खवर
