कपिलवस्तु ।
संघीय र प्रदेश सरकारसँग क्वारेन्टाइनमा भएकाहरुको कोरोना जाँचका लागि पटक–पटक माग गर्दासमेत किट अभाव देखाएर पन्छिएपछि कपिलवस्तुका स्थानीय तहले आफैं किट खरिद गरेका छन् ।
कपिलवस्तुका स्थानीय तहले आफैं कोरोनाको पीसीआर जाँच्ने भीटीएम किट खरिद गरेका हुन् । उनीहरुले क्वारेन्टाइनमा बसेकाहरुको स्वाब संकलन समेत आफैं सुरु गरेका छन् ।
जिल्लाका विभन्न १८८ क्वारेन्टाइनमा बसेका ७ हजार ५ सय ४७ जनाको परीक्षणका लागि ढिलो हुने भएपछि स्थानीय तह आफैं तात्तिएका हुन् ।
कपिलवस्तुको कपिलवस्तु नगरपालिका र शिवराज नगरपालिकाले एक–एक हजार थान भीटीएम किट किनिसकेका छन् । कार्यपालिका बैठकबाट बजेट छुट्याएर डब्लुएचओले प्रमाणित गरेको किट खरिद गरिएको नगरपालिकाहरुले जानकारी दिए ।
महराजगञ्ज नगरपालिकाले १ हजार २ सय थान, बुद्धभूमि नगरपालिकाले एक हजार थान, कृष्णनगर नगरपालिकाले २ हजार थान र यशोधरा गाउँपालिकाले १ हजार २ सय थान किट किन्ने प्रकृया अघि बढाएका छन् ।
जिल्लाका अन्य पालिकाले समेत किट किन्ने तयारी अघि बढाएको जिल्ला स्वास्थ्य कार्यालयले जनाएको छ । समयमै जाँच नगरिए क्वारेन्टाइनमै संक्रमण फैलने डरले यहाँका स्थानीय तहहरु आफंै किट खरिद गर्न तात्तिएका हुन् ।
शिवराज नगरपालिका प्रमुख नेत्रराज अधिकारीले भ्याट सहित ३९० रुपैयाँ पर्ने भीटीएम किट खरिद गरी सयजनाको स्वाबसमेत संकलन गरिएको बताए । जाँचका लागि काठमाण्डौ पठाइएको उनले जानकारी दिए ।
कपिलवस्तु नगरपालिकाले पनि १०५ जनाको स्वाब आफ्नै खरिद गरिएको किटबाट जाँच अघि बढाइसकेको छ । महराजगञ्ज नगरपालिकामा जिल्लाको सबैभन्दा बढी १ हजार ६३० जना क्वारेन्टाइनमा छन् ।
किट अभाव हुँदा क्वारेन्टाइनमा बसेका ८० प्रतिशतभन्दा बढीको परीक्षण हुन सकेको छैन । कपिलवस्तुका क्वारेन्टाइनमा रहेका ७ हजार ५ सय जनाको जीवनसँग केन्द्र र प्रदेश सरकारले खेलवाड गरेको मानवअधिकारकर्मीहरुको आरोप छ ।
सम्बन्धित खवर
