साउन ५,काठमाडौं ।
देशका अधिकांश स्थानमा लगातार वर्षा भएको जल तथा मौसम पूर्वानुमान महाशाखाले जनाएको छ । मनसुनी वायु सक्रिय रहँदा देशभर बदली तथा वर्षा भएको हो ।
यस्तै मनसूनी न्यून चापीय रेखा नेपालतिर सरेकाले पनि देशैभर बदली भएको मौसमविदले बताएका छन्। अहिले देशभर सामान्यदेखि पूर्ण बदली रही धेरै स्थानहरुमा हल्कादेखि मध्यम वर्षा भइरहेको छ।
सोमबार दिउँसो देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षा हुनेछ। प्रदेश १, प्रदेश २, बागमती प्रदेश, प्रदेश ५, गण्डकी प्रदेशका केही स्थान तथा सुदूरपश्चिम प्रदेश र कर्णाली प्रदेशका एक–दुई स्थानमा भारी वर्षाको समेत सम्भावना रहेको मौसमविदले बताएका छन्।
यसैगरी राति भने देशभर पूर्ण बदली रही धेरै स्थानमा हल्कादेखि मध्यम वर्षा हुनेछ। प्रदेश १, प्रदेश २, बागमती प्रदेश, गण्डकी प्रदेश, प्रदेश ५ र सुदूरपश्चिम प्रदेश केही स्थान तथा कर्णाली प्रदेशका एक–दुई स्थानमा भारी वर्षाको सम्भावना रहेको मौसमविदले बताएका छन्।
बाढी पूर्वानुमान महाशाखाका अनुसार आज कोशी, नारायणी, कर्णाली र महाकाली नदीमा उल्लेख्य बढ्ने तथा कोशीका केही सहायक बहाव सतर्कता आसपास हुने अनुमान गरिएको छ। नारायणीका केही सहायक नदीमा बहाव खतराको आसपास रहने देखिएको छ।
कन्काई, कमला, बागमती, तिनाउ, पश्चिम राप्ती, तिनाउका केही सहायक नदीमा आकस्मिक बहाव खतरा आसपास पुग्ने र प्रदेश नम्बर १ को चुरे र तराईबाट बहने स-साना नदीमा बाढी खतराको तह आसपास रहने पूर्वानुमान गरिएको छ।
