भदौ,३०
विपदमा बाल अधिकारको सुनिश्चितताः हामी सबैको प्रतिबद्धताू भन्ने नाराका साथ मनाइएको राष्ट्रिय बाल दिवस २०७७ को अवसरमा बालबालिकाको रचनात्मक क्षमतामा बढोत्तरी गराउने उद्देश्यले आयोजित पाणिनी गाउँपालिका स्तरीय खुला निबन्ध र चित्रकला प्रतियोगिता सम्पन्न भएको छ ।
पहिलो चरणमा बालबालिकाले घरमा नै लेखेर ल्याएका निवन्धहरु मध्येबाट उत्कृष्ट १० निबन्ध छनौट गरी विद्यार्थीहरुलाई २९ गते पालिकामा बोलाई समाजिक दुरी कायम गराउँदै निबन्ध लेखन गराइएको थियो । मूल्याङ्कन समितिको मूल्याङ्कनको आधारमा उत्तकृष्ट निबन्ध तर्फ चार जना र चित्रकला तर्फ चार जनालाई पुरस्कृत गरिएको हो ।
निबन्ध प्रतियोगितामा प्रथम हुने सरस्वती माध्यमिक विद्यालयका मोनिका पौडेल, द्वितीय कमला माध्यमिक विद्यालयका बिन्दु पौडेल, तृतीय कमला माध्यमिक विद्यालयका सृष्टी खनाल र प्रोत्साहन पुरस्कार द्यौराली माध्यमिक विद्यालयका करिश्मा अधिकारीले प्राप्त गर्नु भयो । पुरस्कृतहरुलाई बालबालिकाहरुलाई गाउँपालिकाको तर्फबाट प्रथम, द्वितिय , तृतीय र प्रोत्साहन स्वरुप नगद पुरस्कार क्रमश ८ हजार, ६ हजार, ४ हजार र २ हजार नगद पुरस्कार र प्रमाण पत्र प्रदान गरिएको थियो ।चित्रकला प्रतियोगिता तर्फ प्रथम हुने सरस्वती माध्यमिक विद्यालयका प्रथम सन्देश रेश्मी, द्वितीय द्यौराली माध्यमिक विद्यालयका बिष्णु गैरे , तृतीय हेभेन भिजन इ। बोर्डिङ स्कुलका विवेक सुनार र प्रोत्साहन दुर्वाशेश्वर माध्यमिक विद्यालयका वर्षा बन्जाडे पुरस्कृत हुनुभएको हो । पुरस्कृत हुनेहरुलाई क्रमश ३ हजार, २५ सय, २ हजार र १ हजार नगद रकम र प्रमाण पत्र प्रदान गरिएको हो ।
पुरस्कार वितरण समारोहमा पुरस्कृतका तर्फबाट बोल्दै मोनिका पौडेलले गाउँपालिकाले बालबालिकाहरुको रचनात्मक क्षमता प्रदर्शन गर्ने स्थल प्रदान गरेकोमा धन्यवाद दिदै आगामी दिनमा अझ धेरै यस्ता कार्यक्रम गर्नु पर्ने बताउनु भयो । मूल्याङ्कन समितिका सीता बन्जाडेले सहभागी बालबालिकाहरुले राम्रो गरेकोले आफुहरुलाई मूल्याङ्कन गर्न अप्ठारो परेको बताउनु भयो । मूल्याङ्कन समितिका अर्का सदस्य अनन्त प्रसाख घिमिरेले बालबालिकाहरुको व्याकरण, वाक्य गठन संयोजन लगायतमा कमजोरी देखिएकोले त्यो सुधार गर्न सुझाउनु भयो । कार्यक्रमका विशिष्ट अतिथि गाउँ पालिकाका उपाध्यक्ष लक्ष्मी गौतमले बालबालिकाहरुलाई यस्ता प्रतियोगितामा समावेश गराउन पाएकोमा खुसी व्यक्त गर्नुभयो । बालबालिकालाई यस्ता कार्यमा निरन्तरता दिन सुझाउनु भयो । कार्यक्रमका प्रमुख अतिथि गाउँ पालिकाका अध्यक्ष अच्युत गौतमले कोभिड १९ ले सिर्जना गरेको बन्दाबन्दीका बावजुत बालबालिकाहरुलाई यसरी जम्मा पारेर प्रतियोगिता गराउनु जटिल काम भए पनि सुझबुझ पूर्ण तवरबाट कार्यक्रम सम्पन्न भएकोमा खुःसी व्यक्त गर्दै स्वास्थ्य संयमता अपनाएर नियमित पठनपाठन छिटै अगाडि बढ्ने बताउनु भयो । कार्यक्रमका अध्यक्ष प्रमुख प्रशासकीय अधिकृत मधुकृष्ण पौड्यालले गाउँपालिकाकले बालबालिकाको रचनात्मक क्षमता विकास गर्नको लागि यस्ता खाले कार्यक्रमको निरन्तरता दिने कुरामा जोड दिनुभएको छ । साथै यस्ता अतिरिक्त क्रियाकलापले बालबालिकाको रचनात्मक क्षमता प्रस्फुटन गराउने भएकाले अभिभावक तथा शिक्षकहरुलाई नियमित पठनपाठनको अलावा यस्ता कार्यक्रममा आफ्ना बालबालिकाहरुलाई सहभागी गराउन अनुरोध गर्नुभयो ।
पुरस्कार वितरण कार्यक्रममा गाउँपालिकाका वडा अध्यक्षहरु, विद्यालयका प्राधानाध्यापक ज्यूहरु, अभिभावकहरु, बालबालिकाहरु , गाउँपालिकाका समाजिक विकास शाखा, शिक्षा खेलकुँद तथा युवा शाखा, स्वास्थ्य शाखा लगायता शाखा प्रमुखहरुको उपस्थिति रहेको थियो । गाउँपालिकाका प्रमुख प्रशासकीय अधिकृत मधुकृष्ण पौडेलको अध्यक्षता, गाउँ पालिका अध्यक्ष अच्युत गौतमको प्रमुख आतिथ्यता , गाउँपालिका उपाध्यक्ष लक्ष्मी गौतमको विशिष्ट अतिथ्यतामा कार्यक्रम सम्पन्न भएको थियो भने कार्यक्रम महिला बालबालिका तथा समाजकल्याण इकाईका रमा पौडेलको संयोजन सञ्चालनमा सम्पन्न भएको हो ।
सम्बन्धित खवर
