काठमाण्डौ ।
आजदेखि राष्ट्रियसभाको हिउँदे अधिवेशन सुरु हुँदैछ । प्रतिनिधिसभा विघटन भएको र यसबारेको मुद्दा सर्वोच्च अदालतमा विचाराधीन रहेको अवस्थामा अधिवेशन सुरु हुन लागेको हो ।
राष्ट्रपति विद्यादेवी भण्डारीको आह्वानमा आज दिउँसो ४ बजे राष्ट्रियसभाको बैठक बस्न लागेको छ ।प्रतिनिधि सभा नभएको अवस्थामा सुरु हुन लागेको राष्ट्रियसभाको अधिवेशनलाई चासोपूर्वक हेरिएको छ । जनजीविकाका सवालमा सरकारको ध्यानाकर्षण र सरकारका कामकारबाहीप्रति निगरानी गर्न महत्वपूर्ण भूमिका निर्वाह गर्न सक्ने भए पनि राष्ट्रियसभा एक्लैले कानुन भने बनाउन सक्दैन ।
प्रतिनिधि सभा नभएका बेला सुरु हुन लागेको राष्ट्रियसभाले सदनमा उठेका प्रश्नको सम्बोधनका लागि सरकारलाई निर्देशन दिन, ध्यानाकर्षण गराउन र रुलिङ गर्न सक्नेछ । राष्ट्रियसभाले जनताको चासोका विषय, सरकारले गरेको कामबारे निगरानी गर्न सक्नेछ । यस्तै, सभाले जरुरी सार्वजनिक महत्त्वको प्रस्ताव, संकल्प प्रस्तावसमेत दर्ता र छलफल गर्न सक्नेछ ।
नेकपाको प्रचण्ड–नेपाल समूह तथा प्रमुख प्रतिपक्ष कांग्रेसलगायतका विपक्षी दलले प्रतिनिधिसभा विघटनको विषयलाई राष्ट्रियसभाको बैठकमा उठाउने तयारी गरेका छन् । राष्ट्रिय सभामा यतिबेला १८ वटा विधेयक प्रक्रियामा रहेका छन् । यीमध्ये केही विधेयक दर्ता गरिएको अवस्थामा रहेका छन् भने १० वटा विधेयक संसदीय समितिमा छलफलका क्रममा रहेका छन् ।
राष्ट्रियसभामा नेकपाका ४९, कांग्रेसका ६ र जनता समाजवादीका ३ सांसद छन् ।
