काठमाडौं ।
नेपाल–भारत संयुक्त आयोगको बैठक आज बस्दै छ। नेपाल–भारत संयुक्त आयोगको छैटौं बैठकमा सहभागी हुने नेपाली प्रतिनिधिमण्डलको नेतृत्व गर्दै परराष्ट्रमन्त्री प्रदीपकुमार हिजो तीन दिने भारत भ्रमणका लागि नयाँ दिल्ली पुगेका छन्।
संयुक्त आयोगको बैठकमा सीमा, व्यापार, पारवहनलगायतका विषयमा छलफल हुनेछ। त्यस्तै, कोभिडविरुद्धको खोपमा नेपाल–भारत सहकार्यको मोडालिटीबारे पनि छलफल हुने सरकारले जनाएको छ।
बैठकमा सीमासम्बन्धी मुद्दालाई नेपालले विशेष जोडका साथ उठाउने तयारी गरिरहे पनि भारतले त्यसलाई सामान्य छलफलमै सीमित गर्न चाहेको बताइएको छ।पहिले प्राविधिक रिपोर्ट पूरा गर्नुपर्ने जनाउँदै भारत त्यसमा विस्तृत छलफल नगर्ने पक्षमा देखिएको छ।
बैठकमा नेपाली प्रतिनिधिमण्डलको नेतृत्व परराष्ट्रमन्त्री ज्ञवाली र भारतीय पक्षको नेतृत्व विदेशमन्त्री एस जयशंकरले गर्नेछन्। परराष्ट्र स्रोतका अनुसार मन्त्री ज्ञवालीले शुक्रबार भारतीय समकक्षी एस जयशंकरसँग छुट्टै संवाद गर्नेछन्।
भारतीय विदेशमन्त्री जयशंकरसँगको संवादपछि मात्रै आयोगको बैठक बस्ने कार्यसूची छ। आयोगको बैठक सकिएपछि साढे ३ बजे नेपाल–भारत सम्बन्धमा मन्त्री ज्ञवालीले प्रवचन दिने कार्यसूची रहेको छ।
मन्त्री ज्ञवालीको प्रवचनपछि मात्रै राजनीतिक भेटवार्ता हुनेछ। नयाँ राजनीतिक घटनाक्रमपछि भएको परराष्ट्रमन्त्रीको यो भ्रमणलाई अर्थपूर्ण मानिएको छ। नक्सा प्रकरणपछि चिसिएको सम्बन्धलाई सुधार गर्न यो भ्रमण महत्वपूर्ण हुने अपेक्षा गरिएको छ।
