पाल्पा ।
पछिल्लो समय कोरोना संक्रमणको दर बढ्न थालेपछि सर्तकता अपनाउन थालिएको छ ।संघिय सरकारले संक्रमण फैलिन नदिनको लागी देशैभर सुचित गरे अनुसार पाल्पामा भारतसहित तेस्रो मुलुकबाट आएका व्यक्ति अनिवार्य क्वारेन्टाइनमा बस्नुपर्ने भएको छ।
पाल्पाका प्रमुख जिल्ला अधिकारी योगेन्द्रप्रसाद पाण्डेको अध्यक्षतामा बिहीबार बसेको सर्वपक्षीय बैठकले यस्तो निर्णय गरेको हो। पछिल्लो समय भारतमा कोभिड–१९ महामारीको रुपमा फैलिएपछि यसको रोकथाम र न्यूनीकरणका लागि पाल्पामा यस्तो निर्णय गर्नु परेको प्रजिअ पाण्डेले बताए।
अबदेखि भारत तथा तेस्रो मुलुकबाट आएका कुनै पनि व्यक्ति संक्रमित भए स्थानीय सरकारले निर्माण गरेको आइसोलेसन बस्नु पर्नेछ। सामान्य अवस्थामा रहेका व्यक्ति कम्तीमा १४ दिन होम क्वोरन्टाइनमा अनिवार्य बस्नुपर्ने उनले बताए। उनीहरूको निगरानी गर्न प्रशासनले भनेको छ।
स्थानीय सरकारसँग समन्वय गरेर उनीहरूको कोरोना परीक्षणको व्यवस्था मिलाइने छ। क्वारेन्टाइन तथा आइसोलेसनमा राख्ने व्यवस्थाका लागि स्थानीय सरकारलाई पत्राचार गरिने पाण्डेले बताए।
यस्तै‚ होली पूर्णिमा लगायत मेला,जात्रा, महोत्सव, वार्षिकोत्सव, भेला, जुलुस तथा र्यालीजस्ता भीडभाड हुने कार्यक्रम गर्न रोक लगाइएको छ। भीडभाडबाट कोभिड–१९ संक्रमण फैलिने हुँदा यस्ता गतिविधि नगर्न प्रशासनले निर्देशन दिएको छ। प्रशासनले क्वारेन्टाइन र आइसोलेसन तयारी अवस्थामा राख्न स्थानीय सरकारलाई निर्देशन दिएको छ। स्वास्थ्य सेवालाई प्रभावकारी बनाउन स्वास्थ्य संस्थालाई पत्राचार गरिने पाण्डेले बताए।
कोभिड–१९ संक्रमण थप फैलन नदिने स्थानीय सञ्चार माध्यमसँग समन्वय गरेर चेतनामुलक सन्देश प्रकाशन तथा प्रशारण गरिने छ। नेपाल प्रहरीले माइकिङमार्फत सन्देश प्रवाह गर्ने छ। स्वास्थ्य मापदण्डको पूर्ण पालना गर्नुपर्ने छ। मास्क नलगाइ हिँडने व्यक्तिलाई संक्रमक रोग ऐन २०२० अन्तर्गत कारबाही गरिने उनले बताए।
साबुन पानीले नियमित हात धुनुपर्ने, स्यानीटाइजरको प्रयोग गर्न समेत आग्रह गरिएको छ। राती नौ बजेदेखि कुनै पनि होटल, रेष्टुरेण्ट, तथा मदिरा बिक्री वितण गर्न नपाइने सर्वपक्षीय बैठकले निर्णय गरेको छ।पाल्पामा मौज्दात रहेका कोरोनाविरुद्धको खोप जिल्ला प्रवेश नाकामा रहेका बस्तीमा छुट भएका लक्षित समूहका व्यक्ति, शिक्षक, सवारी चालक र सहचालकलाई लगाइने प्रजिअ पाण्डेले बताए।
निर्णयको पूर्णरुपमा पालना गरेर आफू बाच्न र अरुलाई पनि बचाउन आम नागरिकसँग उनले अपिल गरेका छन्।
सम्बन्धित खवर
