बाँके ।
नेपालगञ्जमा निस्सासिएर एकै परिवारका चार जनाको मृत्यु भएको छ भने तीन जना बेहोस भएका छन् ।
भेरी अस्पतालसँगै जोडिएको कर्णाली प्रदेशको खरिद तथा आपूर्ति शाखामा कार्यालय सहयोगीका रूपमा कार्यरत धनप्रसाद भट्टराईको चार जना परिवारको निस्सासिएर मृत्यु भएको हो । धनप्रसाद परिवारसँगै मेडिकल स्टोरकै क्वाटरमा बस्थे ।
धनप्रसादका सात जना परिवार एउटै कोठामा सुतेका थिए । तातोका लागि धनप्रसादले ढोका छेउमै टिनको बट्टामा कोइला बालेका थिए । झ्याल र ढोका बन्द गरेर टिनको बट्टामा कोइला बालेर सुतेका भट्टराई परिवारका चार सदस्यको मृत्यु भएको छ भने तीन जनालाई बेहोस अवस्थामा बिहीबार बिहान अस्पताल पुर्याइएको छ ।
मृत्यु हुनेमा कालिकोटका २३ वर्षीय धनप्रसाद भट्टराई, तीन महिनाको छोरा इप्सन, ४५ वर्षीया आमा कोपिला भट्टराई र २७ वर्षीया दिदी नन्दकली भट्टराई रहेका छन् । २४ वर्षीया श्रीमती सुशीला भट्टराई, तीन वर्षीय छोरा दिवस र १८ वर्षीय भाइ नरेन्द्र भट्टराईलाई बेहोस अवस्थामा भेरी अस्पतालमा पुर्याइएको छ । तीनै जनाको भेरीमै उपचार भइरहेको छ । छोरा दिवस र भाइ नरेन्द्रको अवस्था गम्भीर रहेको छ । श्रीमती सुशीला बोल्न सक्ने अवस्थामा छन् ।
घटनाका बारेमा बिहान साढे ७ बजे प्रहरीलाई खबर गरिएलगत्तै प्रमुख जिल्ला अधिकारी सूर्यबहादुर खत्री, एसपी श्यामकृष्ण अधिकारीको टोली पुगेको थियो । जिल्ला प्रहरी कार्यालय, बाँकेका मुद्दा शाखाका प्रमुख प्रहरी निरीक्षक खिमबहादुर घर्तीले आफूहरू जाँदासम्म कोठामा खार आइरहेको बताउनुभयो ।
भट्टराईको कोठामा दुई वटा पलङ थियो । त्यसमा नअटेर भुईंमा म्याट ओछ्याएर सुतेका थिए । तीनमहिने बच्चालाई जाडो होला भनेर भट्टराईले कोइला बालेका थिए । शुरूमा कोठाभन्दा बाहिर आगो बालेका भट्टराईले त्यसबाट कोइला बनाएर टिनको बट्टामा भरेका थिए । कोइला भरिएको टिनको बट्टालाई कोठाभित्र ढोका छेउमा राखिएको थियो । श्रीमती सुत्केरी भएको तीन महिना भएको र बच्चासमेत सानो रहेकाले तातोका लागि भट्टराईले आगोको व्यवस्था गरेका थिए ।
एउटै कोठामा एकै परिवारका सात जना अचेत अवस्थामा फेला परेपछि प्रहरीले शंका मानेर तालिम प्राप्त कुकुरलाई लिएर गएको थियो । शुरूमा कर्तव्य ज्यान हुन सक्ने आँकलन गरिए पनि त्यस्तो कुनै लक्षण देखिएको थिएन । प्रहरी जाँदासम्म कोठामा खार आइरहेकाले निस्सासिएर नै भट्टराई परिवारको मृत्यु भएको सबैको बुझाइ थियो । राति नै काम परेर भट्टराईलाई फोन गर्दा नउठेको कर्मचारीसम्बद्धले बताएका छन् ।
सम्बन्धित खवर
