सैनामैना ।
रुपन्देहीको सैनामैना नगरपालिकाले सामुदायिक विद्यालयमा १६० जना शिक्षकलाई ल्यापटप वितरण गरेको छ ।
नगरपालिकाको ‘एक शिक्षक, एक ल्यापटप’ भन्ने वार्षिक कार्यक्रम अन्तरगत नगर प्रमुख चित्रबहादुर केसीले शिक्षकहरुलाई सोमबार ल्यापटप वितरण गरेका हुन् ।
प्रविधीमा आधारित अपनत्व सहितको गुणस्तरीय शिक्षा, सैनामैनाको प्रतिबद्धता भन्ने नारासहित नगरको महत्वकांक्षी योजना अन्तरगत ल्यापटप वितरण गरिएको हो ।
नगरका १७ वटा सामुदायिक विद्यालयका शिक्षकले ल्यापटप प्राप्त गरेका हुन् । सो अवसरमा बोल्दै नगरप्रमुख कार्कीले लागत सहभागितामा विद्यालयका शिक्षकहरुलाई ल्यापटप प्रदान गरिएको बताए । उनले २५ प्रतिशत लागत सहभागितामा शिक्षकहरुलाई सो ल्याप्टप वितरण गरिएको जानकारी गराए । नगरको शैक्षिक विकास तथा प्रविधीमैत्री शिक्षालाई जोड दिँदै ल्यापटप वितरण गरिएको उनले बताए ।
योग्यता र कार्यदक्षता भएका शिक्षकलाई विद्यालयले सिफारिस गरेको आधारमा प्रदान ल्यापटप वितरण गरिएको हो ।
नगरपालिकाको १ करोड २० लाख ९५ हजार ५२० रुपैयाँ लागतमा ल्यापटप वितरण गरिएको प्रमुख प्रशासकीय अधिकृत भिमप्रसाद तिवारीले जानकारी गराए ।नगरपालिकाको ७५ प्रतिशत लागत र शिक्षकहरुको २५ प्रतिशत लागतमा उक्त ल्यापटप वितरण गरिएको हो ।प्रति ल्यापटप ७५ हजार ५ सय ९७ रुपैयाँ लागत रहेको छ ।
यस अघि पनि नगरपालिकाले अनुदानमा ल्यापटप वितरण गरेको सैनामैना नगरपालिका उपप्रमुख विना रानाले बताइन् ।
सम्बन्धित खवर
