पाल्पा – “स्वास्थ्यका लागि खेलकुद; राष्ट्रका लागि खेलकुद” भन्ने मूल नाराका साथ रिब्दीकोट गाउँपालिका वडा नं. ६, ठिमुरेमा टोल तथा क्लब स्तरीय खुल्ला महिला तथा पुरुष भलिबल प्रतियोगिता भइरहेको छ । चालू आर्थिक वर्ष २०८१/०८२ को स्वीकृत वार्षिक कार्यक्रम अन्तर्गत आयोजित प्रतियोगिता जेष्ठ वडा सदस्य भरत बहादुर जि.सि.को अध्यक्षतामा सुरु भएको थियो ।
प्रतियोगिताको उद्घाटन समारोहका प्रमुख अतिथि रिब्दीकोट गाउँपालिका अध्यक्ष नारायण बहादुर कार्कीले कार्यक्रमको औपचारिक उद्घाटन गर्नुभएको थियो । उद्घाटन कार्यक्रममा बोल्दै अध्यक्ष कार्कीले भलिबल खेल नेपालभरि लोकप्रिय भएको उल्लेख गर्दै यसले युवाहरूलाई खेलकुदमा सहभागी हुन प्रेरणा दिने बताउनुभयो । उहाँले खेलकुदले शारीरिक स्वास्थ्यमा सुधार ल्याउने मात्र नभई सामाजिक सद्भाव, अनुशासन र भाइचाराको भावना विकास गर्न महत्त्वपूर्ण भूमिका खेल्ने कुरा पनि जोड दिनुभयो ।
कार्यक्रममा निवर्तमान गाउँपालिका अध्यक्ष नारायण बहादुर जि.सि. को विशिष्ट आतिथ्यता रहेको थियो भने वडा सदस्यहरू, टोल विकास समितिका प्रतिनिधिहरू, स्थानीय खेलप्रेमीहरू, समाजसेवीहरू तथा सरोकारवाला निकायका प्रतिनिधिहरूको पनि उल्लेखनीय उपस्थिति थियो । प्रतियोगिता रिब्दीकोट गाउँपालिका वडा नं. ६ स्थित घोर्लिखरक खेलमैदानमा आयोजना गरिएको थियो । जहाँ स्थानीय समुदायको उत्साहजनक उपस्थिति देखिएको थियो ।
समारोहमा बोल्दै गाउँपालिकाका निवर्तमान गाउँपालिका अध्यक्ष नारायण बहादुर जि सीले खेलकुदले व्यक्तिको शारीरिक तथा मानसिक स्वास्थ्यमा सकारात्मक प्रभाव पार्ने बताउनुभयाे । भलिबलजस्ता खेलहरू कुनै ठूलो मैदान आवश्यक नपर्ने हुँदा गाउँ-गाउँमै खेल्न सकिन्छ, जसले गर्दा ग्रामीण क्षेत्रमा पनि यसले व्यापक लोकप्रियता पाएको बताउनुभयो । खेलकुदले युवाहरूलाई नकारात्मक क्रियाकलापहरूबाट टाढा राख्न सहयोग पुर्याने र उनीहरूलाई अनुशासित र जिम्मेवार नागरिक बन्न प्रेरित गर्ने बताउनुभयो ।
प्रतियोगितामा वडा नं. ६ का विभिन्न टोल तथा क्लबहरूबाट आएका महिला र पुरुष टोलीहरूले भाग लिएका थिए । सहभागी टोलीहरूले आफ्नो खेल कौशल प्रस्तुत गर्दै दर्शकहरूलाई मनोरञ्जन प्रदान गरेका थिए । खेलकुद कार्यक्रमले युवाहरूलाई आफ्नो प्रतिभा प्रदर्शन गर्ने मंच प्रदान गर्नुका साथै भविष्यका सम्भावित खेलाडीहरूको पहिचान गर्न समेत मद्दत पुर्याउने अपेक्षा गरिएको रिब्दीकाेट गाउँपालिकाका खेलकुद विकास समितिका संयाेजक दिपक पचभैया बताउनुभयो ।
सम्बन्धित खवर
