तानसेन । पाणिनी गाउँपालिका अर्घाखाचीको पवित्र स्थल पाणिनि तपोभूमिमा यहि चैत्र २७ र २८ गते २ दिन सम्म संचालन हुने पाणिनी महोत्सव तथा सम्मेलन सफल बनाउन सरोकारवालासँग छलफल र अन्तरक्रिया गरिएको छ । पाणिनी गाउँपालिकाले यो ऐतिहासिक तथा धार्मिक स्थललाई राष्ट्रिय तथा अन्तर्राष्ट्रिय रूपमा प्रवद्र्धन गर्न विभिन्न योजनाहरू अघि सारेको छ ।
गाउँपालिकाका प्रमुख प्रशासकीय अधिकृत रोमनाथ न्यौपानेका अनुसार लुम्बिनी प्रदेश पर्यटन विकास परिषद्को सहयोगमा पर्यटन विकासका सम्भावनाहरू थप सुदृढ बनाउने योजना छ । बैठकमा पर्यटन प्रवद्र्धनका लागि आवश्यक रणनीति बनाउने, सम्मेलनको बजेट तथा स्रोतसाधनको व्यवस्था गर्ने, तथा धार्मिक पर्यटनको प्रवद्र्धनलाई प्राथमिकता दिने विषयमा छलफल भएको थियो ।
लुम्विनी प्रदेशको पर्यटन विकास परिषदको सभाहल बुटबलमा भएको छलफलमा पाणिनी गाउँपालिकाका अध्यक्ष टेकराज न्यौपाने, पर्यटन विकास परिषदका कार्यकारी निर्देशक रामु जोशी,प्रशासकीय अधिकृत,सिता पोख्रेल अर्याल, अधिकृत शंकर पौडेल,गाउँपालिकाका प्रमुख प्रशासकीय अधिकृत रोमनाथ न्यौपाने लगायतको टोली पाणिनी गाउँपालिकाका ८ वटा वडाहरु पणेना,पोखराथोक,खिदिम,पटौटी,मैदान,धातिवाङ्ग,अड्गुरी र पाली रूपन्देही सम्पर्क समाजका अध्यक्षहरू ,पूर्व अध्यक्षहरू,उपाध्यक्ष,सचिव लगायत ब्यक्तित्वहरू उपस्थितिमा सरोकारवाला संगको छलफल तथा अन्तर्कृया गरीएको हो ।
कार्यक्रममा पाणिनी तपोभूमि नेपालकै महत्वपूर्ण धार्मिक, सांस्कृतिक, र ऐतिहासिक स्थल भएको, जहाँ संस्कृत व्याकरणका रचयिता पाणिनीले तपस्या गरेको मानिने हुँदा यस क्षेत्रलाई विश्वस्तरमा चिनाउन प्रचारप्रसारको आवश्यकता रहेको बताउदै हालसम्म यहाँका मन्दिरहरू, धर्मशाला, र ऐतिहासिक स्थलहरूको संरक्षण तथा प्रवर्द्धनका लागि प्रयास भइरहेको जनाईएको छ ।
यस क्षेत्रको पर्यटन तथा धार्मिक महत्वलाई बढावा दिन नेपाल सरकारले घोषणा गरेका पर्यटन स्थलहरु मध्ये पाणिनी तपोभूमि सय प्रमुख पर्यटकीय गन्तव्यभित्र भित्र पर्दछ । स्थानीय तह र सरोकारवालाहरूले यसको विकासका लागि थप योजनाहरू ल्याउने विषयमा छलफल गरिएको प्रमुख प्रशासकीय अधिकृत रोमनाथ न्यौपानेले बताउनु भयो ।
सम्बन्धित खवर
