गुल्मी । गुल्मीमा यहि आउदो चैतको २९ गतेबाट सञ्चालन हुने दोस्रो गुल्मी महोत्सवको तयारी तिब्र पारिएको छ । गुल्मी चेम्बर अफ कमर्सको तम्घास गुल्मीको आयोजनामा हुने महोत्सवलाई सम्पन्न गर्नका लागि शनिबार जिल्ला स्थित विभिन्न व्यवसायीसँग छलफल गरिएको छ ।
महोत्सवलाई व्यवस्थित रुपले सञ्चालन गर्नका लागि विभिन्न व्यवसायीहरुको राय सुझाव संकलन गरेर अगाडी बढ्ने निर्णय भएको गुल्मी चेम्बर अफ कमर्सका अध्यक्ष दुर्गाप्रसाद पाण्डेले बताए । “गुल्मी जिल्लाको समृद्धिको आधार ः कृषि, पर्यटन, उद्योग र ब्यापार” भन्ने मुख्य नारासहित दोस्रो गुल्मी महोत्सव–२०८१ तथा कृषि, पर्यटन, ब्यापार एवम् औद्योगिक मेला २९ चैत २०८१ देखि १३ बैशाख २०८२ सम्म संचालन हुनेभएको हो ।
महोत्सवबाट ३० करोडको आर्थिक कारोबार र डेढ लाख जनाले अवलोकन गर्ने अपेक्षा आयोजकले गरेको छ । महोत्सवमा गुल्मीको समग्र कृषि, पर्यटन, स्थानीय संस्कृति र स्थानीय उत्पादन लगायतलाई प्राथमिकता दिइनेछ । स्थानीय स्टल निःशुल्क राख्न पाइनेछ ।
यसबाट आएको आर्थिक आम्दानी सामाजिक क्षेत्रमा पनि खर्च गर्ने आयोजक संस्थाले जनाएको छ । यसअघि जिल्ला सदरमुकाम तम्घास स्थित चिदीचौर खेल मैदानमा महोत्सव हुँदै आएको थियो ।
तर त्यस ठाउँलाई सौन्दर्यकरण गर्न भन्दै महोत्सव गर्न नपाइने भएपछि तम्घासको खानीगाउँ स्थित नुनथला भन्ने स्थान हुने भएको हो । महोत्सवमा टिकट शुुल्क विद्यार्थी ५० रुपैयाँ र अन्य व्यक्तिलाई १०० रुपैयाँ लाग्नेछ ।
७० वर्ष भन्दा माथिका ज्येष्ठ नागरिक, पाँच वर्ष मुनिका बालबालिका र अपाङ्गता भएका व्यक्तिलाई निःशुल्क प्रवेश दिइने अध्यक्ष पाण्डेले बताए । महोत्सवमा साँस्कृतिक कार्यक्रम अन्तर्गत स्थानीय देखि राष्ट्रिय स्तरका कलाकारको सहभागिता रहनेछ । महोत्सवमा बिभिन्न औधोगित क्षेत्रबाट उत्पादित सामाग्रीहरुसँगै गुल्मी जिल्लामा बिभिन्न जाती बिशेष रहेका खाना परिकारहरु, बिभिन्न सँस्कृति झल्कीने झाँकीहरु पनि प्रर्दशन गरिने भएको छ ।
जिल्लाको सदरमुकाम तम्घासमा चल्ने महोत्सवबाट गुल्मी जिल्लाको कृषि, घरेलु औधोगिक प्रर्बद्धनसगै पर्यटकीय क्षेत्रहरुको प्रर्बद्धन र प्रचार प्रसार महत्वपुर्ण उदेश्य आयोजकको रहेको छ । महोत्वसमा स्थानीय र राष्ट्रिय स्तरका कलाकारहरुको पनि प्रस्तुति रहने आयोजकले जनाएको छ ।
सम्बन्धित खवर
