तानसेन । अष्ट्रेलियाको सिड्नीमा हालै सम्पन्न ‘New South Wales International Open Taekwondo Championship 2025’ मा गुल्मीका बिकलले चम्किलो प्रदर्शन गर्दै रजत पदक जितेका छन् । उनले आफ्नो वर्गमा उत्कृष्ट खेल कौशल प्रदर्शन गर्दै फाइनलसम्मको यात्रा तय गरेका हुन ।
बिकल सानैदेखि तेक्वान्दोप्रति आकर्षित थिए। बाल्यकालदेखि खेलमा रुचि राख्ने बिकलले लामो समयको मेहनत, अनुशासन र समर्पणको फलस्वरूप आज अन्तर्राष्ट्रिय मञ्चमा नेपालको नाम उज्यालो पार्न सफल भएका हुन् ।
नेपाली तेक्वान्दो संघका प्रतिनिधिहरूले बिकलको सफलतालाई ऐतिहासिक भनेका छन्। उनीहरूका अनुसार, यस्तो अन्तर्राष्ट्रिय मञ्चमा नेपाली खेलाडीको उपस्थिति र पदक जित्नु नेपालका अन्य युवा खेलाडीहरूका लागि प्रेरणाको स्रोत बन्नेछ।
यसअघि पनि नेपाली खेलाडीहरूले अन्तर्राष्ट्रिय तेक्वान्दो प्रतियोगितामा पदक जित्दै आएका छन्, तर बिकलको यो सफलता विशेष रूपमा उल्लेखनीय छ, किनभने यो पदक उनले आफू स्वयंको पहल र कडा मेहनतका आधारमा जितेका हुन्।
बिकलले भने:”यो मेरो मात्र सफलता होइन, सम्पूर्ण नेपालको हो। मैले जितेको पदक देशप्रेम, कडा मेहनत र जनताको साथको प्रतिफल हो।”
उनले प्रतिस्पर्धाको प्रत्येक चरणमा आत्मविश्वासपूर्वक खेल्दै दर्शकहरूलाई समेत प्रभावित पारे । बिकल यसअघि पनि राष्ट्रिय तथा अन्तर्राष्ट्रिय तेक्वान्दो प्रतियोगिताहरूमा सफलता हात पारिसकेका अनुभवी र समर्पित खेलाडी हुन् । उनको अनुशासन, कडा मेहनत र देशप्रतिको माया नै उनलाई निरन्तर सफलताको शिखरतर्फ डोर्याइरहेको छ ।
बिकलको यो सफलता गुल्मी जिल्लाका लागि मात्र नभई सम्पूर्ण नेपालको लागि गर्वको विषय हो। यसले नेपाली खेलाडीहरूको अन्तर्राष्ट्रिय स्तरमा प्रतिस्पर्धा गर्ने क्षमता र समर्पणलाई पुष्टि गर्दछ।
उनको यो सफलताले नेपाली तेक्वान्दो खेलमा थप हौसला, प्रेरणा र अन्तर्राष्ट्रिय स्तरमा पहिचान दिलाउने कार्य गरेको छ । यसैबीच, नेपाल तेक्वान्दो संघ, खेलप्रेमीहरू र बिकलका समर्थकहरूले उनलाई बधाइ तथा शुभकामना दिएका छन् ।
सम्बन्धित खवर
