पाल्पा । रम्भा गाउँपालिका, पूर्वखोला गाउँपालिका र निस्दी गाउँपालिकामा सञ्चालित क्षयरोग कार्यक्रमको प्रभावकारीता र चुनौतिबारे संयुक्त रुपमा समीक्षा र विश्लेषण सम्पन्न भएको छ । रम्भा गाउँपालिका २ फोक्सिङ्गकोटको रानीबास सामुदायिक होमस्टेको सभाहलमा सञ्चालन भएको समीक्षा कार्यक्रममा तीन वटै गाउँपालिकामा क्षयरोगी पत्ता लागेको दर, उपचार र सफलता तथा भावी कार्यक्रम र योजनाबारे व्यापक छलफल चलाइएको छ ।
क्षयरोग सहरी क्षेत्र संगै ग्रामीण क्षेत्रमा व्यापक फैलिएको र यसको रोकथामको लागि स्थानीय सरकारले गरेको पहलकदमीबारे सहभागीहरुले धारणा राखेका थिए । कार्यक्रमका प्रमुख अतिथि पुर्वखोला गाउँपालिका अध्यक्ष नूनबहादुर थापाले क्षयरोग रोकथाम र न्यूनीकरणको लागि स्थानीय सरकारहरुको साझा प्रयासले धेरै सफलता मिले पनि यो रोग निर्मूल पार्न सबैको सचेतनामूलक प्रयास नै मुख्य मुद्दा रहेको बताउनु भयो । उपलब्ध जनशक्तिको अधिकतम र समर्पित प्रयासले क्षयरोग रोक्न सकिने वहाँले बताउनु भयो ।
कार्यक्रममा विशिष्ट अतिथि रम्भा गाउँपालिका उपाध्यक्ष राधाकुमारी श्रेष्ठ तथा जिल्ला समन्वय समिति पाल्पाका सदस्य भोवीसरा सारुले क्षय रोग रोकथामको लागि सबै स्वास्थ्य संस्थाको महत्वपूर्ण भूमिका रहेकोले स्वास्थ्यकर्मीहरु ईमान्दारीका साथ रोकथाम कार्यमा संलग्न हुनुपर्ने बताउनु भयो । कार्यक्रममा स्वास्थ्य कार्यालय पाल्पाका प्रमुख टुकप्रसाद पोखरेल, पूर्वखोला गाउँपालिकाका प्रमुख प्रशासकीय अधिकृत सुन्दर प्रसाद श्रेष्ठ, निस्दी गाउँपालिकाका प्रमुख प्रशासकीय अधिकृत मदन अर्याल, रम्भा गाउँपालिकाका प्रमुख प्रशासकीय अधिकृत वीरबहादुर पुन लगायतले क्षय रोग नेपालकै प्रमुख स्वास्थ्य समस्याको रुपमा रहेकोले यसलाई निर्मूल पार्न स्थापित नीतिको पूर्ण र प्रभावकारी कार्यान्वयन नै उपायको रुपमा रहेको बताउनु भयो ।
समीक्षा कार्यक्रममा रम्भा, पूर्वखोला र निस्दी गाउँपालिकाका स्वास्थ्य संस्थाका प्रमुख, क्षयरोग फोकल पर्सन, स्वास्थ्य शाखाका कर्मचारीहरु गरी ३० जनाको सहभागीता रहेको थियो । स्वास्थ्य कार्यलय पाल्पाका विश्वनाथ न्यौपानेले सहजीकरण गर्नु भएको कार्यक्रममा रम्भा गाउँपालिका स्वास्थ्य शाखा प्रमुख शिवप्रसाद अर्यालले स्वागत गर्नु भएको थियो । कार्यक्रत्रममा पूर्वखोला गाउँपालिका रिङ्गनेरह स्वास्थ्य चौकीका प्रमुख श्रीराज आचार्यले क्षयरोग निर्मूल पार्न अपनाईएको रणनीतिलाई कडाका साथ कार्यान्वयन गरिने प्रतिबद्धता जनाउनु भएको थियो ।
रम्भा गाउँपालिकाका अध्यक्ष विष्णुप्रसाद भण्डारीको अध्यक्षतामा चलेको समीक्षा कार्यक्रमको संचालन रम्भा गाउँपालिकाका जनस्वास्थ्य अधिकृत महेशप्रसाद आचार्यले गर्नु भएको थियो । रम्भा गाउँपालिकाले रानीबास सामुदायिक होमस्टेको प्रचार र प्रबर्धनको लागि होमस्टेको सभाहलमा समीक्षा बैठकको आयोजना गरेको हो ।
