पाल्पा । बगनासकाली गाउँपालिकाका महिलाहरु उद्यमशील बन्दैछन् । यहाँ निर्माण भएको दुनाटपरीले जिल्लामा राम्रो पहिचान बनाएको छ । ब्यापार राम्रो भएपछि महिलाहरुलाई सालको पात टिप्न र दुनाटपरी बनाउन भ्याई नभ्याई छ ।
पोखराथोकमा महिलाहरुले बनाउँदै आएको दुनाटपरी भैरव स्थान मन्दिर सहित अन्य क्षेत्रका बिक्री हुँदै आएको छ । महिलाहरुले सामुहिक रुपमा दुनाटपरी बनाउने र बेच्दै आएका छन् । यसबाट एकातर्फ उनीहरुको समयको सदुपयोग भएको छ भने अर्कोतर्फ आम्दानी समेत बढेको छ ।
गरिबी निवारणका लागि लघुउद्यम विकास कार्यक्रम (मेड्पा) कार्यक्रम अन्तरगत बगनासकाली गाउँपालिकाले महिलाहरुको सीप विकास र उनीहरुले उत्पादन गरेका उत्पादनको बजारीकरणमा बिशेष ध्यान दिएको बगनासकाली गाउँपालिका मेड्पा कार्यक्रमका फोकल पर्सन प्रेम बगालेले बताउनुभयो ।
यस वर्ष मेड्पा कार्यक्रम अन्तरगत बगनासकाली–६ यम्घाको टोक्सेमा २२ जना महिलाहरुका लागि परालको चप्पल बनाउने ५ दिने तालिम संचालन गरिएको छ । गाउँघरमा पाइने परालबाट बनाइने चप्पल किरियापुत्रीहरुका लागि आवश्यक हुने र यसको बजारीकरणमा समेत समस्या नहुने भएकोले महिलाहरुले उक्त सीप सिकेर ब्यवसायिक रुपमा परालको चप्पल बनाउने अभियानमा छन् ।
त्यस्तै वडा नं. १ चिर्लुङधाराको घोरबन्दामा ९ जनाका लागि १ महिने होजियारी तालिम संचालन गरिएको छ । यो तालिममा खासगरी बिद्यालय समयमा आफ्ना छोराछोरीलाई बिद्यालयमा ल्याएर छोड्ने र दिनभरको समय सदुपयोग गर्ने महिलाहरु सहभागी छन् । यहाँ महिलाहरुले ब्यवसायिक रुपमा होजियारी संचालन समेत गर्दै आएका छन् । उनीहरुले यो सामुहिक अभ्यास पनि राम्रो सफल भएको छ ।
त्यस्तै बगनासकाली भित्रका ३४ जना किसानहरुलाई ब्यवसायिक बंगुरपालन, कुखुरापालन तालिम संचालन गरिएको छ । ४ दिनसम्म चलेको तालिममा बगनासकालीभित्र बंगुरपालन कुखुरापालन गर्दै आएका र यो ब्यवसाय गर्न इच्छुक ब्यक्तिहरुको सहभागिता रहेको थियो ।
मेड्पा कार्यक्रम अन्तरगत अघिल्ला वर्ष पनि तालिम सञ्चालन गर्दै आएको र यस वर्ष पनि उक्त तालिमको स्तरोन्नती तालिम संचालन गरिएको छ । पोखराथोकमा महिलाहरुलाई तरकारी बाली मसलाबाली सम्बन्धी ३ दिनको तालिम संचालन गरिएको छ । ८ जनाले यो तालिम लिएका छन् । महिलाहरुलाई प्रति उद्यमी ५० किलोको दरले अदुवाको बिउ बितरण गरिएको र उनीहरुलाई आगामी वर्ष उक्त बिउ फिर्ता गर्ने र अन्य उद्यमीहरुलाई उक्त बिउ पुनः फिर्ता गर्ने गरी वितरण गरिने बगालेले बताउनुभयो ।
पोखराथोकमै कुखुरापालन गरिरहेका उद्यमीहरुलाई ३ दिनको कुखुरापालन सम्बन्धी पुर्नताजगी तालिम संचालन गरिएको छ । मेड्पा कार्यक्रम अन्तरगत यहाँका महिला उद्यमीहरुलाई अन्तरपालिका स्तरीय अवलोकन भ्रमण अन्तरगत सुनवल लगेर त्यहाँको उद्यम विकासको अवस्थाबारे देखाइएको बगालेले बताउनुभयो ।
आफूहरुले निर्माण गरेका दुनाटपरी र परालको चप्पलको माग राम्रो रहेको समूहकी अध्यक्ष कल्पना बिकले बताउनुभयो । कल्पनाले समूहको नेतृत्व गर्नुका साथै बिभिन्न स्थानमा हुने मेड्पा तालिममा प्रशिक्षकको भूमिका समेत निर्वाह गर्दै आउनुभएको छ । “समूहमा काम गर्न पाउँदा महिला दिदी बहिनीहरु पनि खुशी हुनुहुन्छ । समयको सदुपयोग भएको छ काम गरेपछि घरखर्च चलाउने पैसा पनि आउँछ । धेरै राम्रो भएको छ ।” उहाँले भन्नुभयो । बनमा खेर गइरहेको सालको पात र सस्तो मूल्यमा पाइने परालबाट धेरै आम्दानी गर्न सकिने भएकोले महिलाहरुका लागि यो कार्यक्रम निकै प्रभावकारी भएको बताउनुभयो ।
बगनासकाली गाउँपालिका उपाध्यक्ष हरिप्रसाद पाठकले उद्यमशील समुदाय निर्माण हुनु नै समृद्ध पालिका निर्माणको मुख्य आधार भएको बताउनुभयो । गाउँपालिका अध्यक्ष सरस्वती चिदीले समुदायको आवश्यकता र माग अनुसार तालिम संचालन गरी उनीहरुलाई तालिम अनुसारको काममा प्रतिबद्ध भई लगाउनु नै आजको आवश्यकता रहेको र यसमा बगनासकाली गाउँपालिका लागिपरेको बताउनुभयो ।
सम्बन्धित खवर
