पाल्पा — तानसेन नगरपालिकाको १७औं नगर सभाको पहिलो बैठक मंगलबार सम्पन्न भएको छ। बैठकमा चालु आर्थिक वर्ष २०८२र८३ का लागि नीति तथा कार्यक्रम तथा विनियोजन विधेयक प्रस्तुत गरिएको छ। नगर सभाको अध्यक्षता सभाध्यक्ष सन्तोषलाल श्रेष्ठले गर्नु भएको थियो । सभामा बोल्दै नगर प्रमुख श्रेष्ठले तानसेन नगरपालिकाले आगामी आर्थिक वर्षका लागि विकास,समावेशिता, सुशासन र पूर्वाधार निर्माणमा विशेष प्राथमिकता दिँदै नीति तथा कार्यक्रम अघि सारेको जानकारी दिनुभयो। उहाले शिक्षा, पर्यटन,स्वास्थ्य, सहरी पूर्वाधार, सामाजिक समावेशिता, वातावरण संरक्षण, कृषि र पर्यटन क्षेत्रलाई केन्द्रमा राखेर कार्यक्रमहरू तयार गरिएको स्पष्ट पार्नुभयो ।
सभामा नगर उपाध्यक्ष प्रतिक्षा सिंझालिले आर्थिक वर्ष २०८२र८३ को बजेट तथा विनियोजन विधेयक प्रस्तुत गर्नुभयो । उहाका अनुसार तानसेन नगरपालिकाको यस वर्षको कुल बजेट १ अर्ब ४६ करोड ५० लाख ९६ हजार ८ सय ७ रुपैयाँ रहेको छ । प्रस्तुत बजेटअनुसार चालु खर्चतर्फ ६२ करोड ७ लाख ३५ हजार रुपैयाँ छुट्याइएको छ, जुन कुल बजेटको ४२।३७ प्रतिशत हो । त्यस्तै, पुँजीगत खर्चतर्फ ८४ करोड ४३ लाख ६१ हजार रुपैयाँ विनियोजन गरिएको छ, जसले ५७।६३ प्रतिशत हिस्सा ओगटेको छ। साथै, रु ८५ लाख रुपैयाँ वित्तीय व्यवस्थाका लागि छुट्याइएको बताउनुभयो।
नगरपालिकाले उक्त सम्पूर्ण बजेट सञ्चित कोषबाट खर्च गर्ने गरी प्रस्ताव अघि सारेको हो। नीति तथा कार्यक्रमले स्थानीय आवश्यकता, पूर्वाधारको खाँचो, युवा तथा महिला सशक्तिकरण, लैङ्गिक समानता, वातावरणीय संरक्षण, सामाजिक सुरक्षा, अपांगता भएका व्यक्तिहरुको पहुँच सुनिश्चितता लगायतका विविध पक्षलाई समेटेको छ ।
नगरपालिकाले आगामी वर्षलाई कार्यदक्षता, जवाफदेहिता, र नागरिक सहभागिताको वर्षको रूपमा अघि बढाउने योजना बनाएको छ। नीति तथा कार्यक्रम र बजेटमाथि छलफलपछि संशोधन सहित पारित गरिने र त्यसपछि कार्यान्वयनमा लैजाने छ । सभामा नगर प्रमुख, उपप्रमुख, वडा अध्यक्षहरू, नगर कार्यपालिका सदस्यहरू, कर्मचारी, विभिन्न समितिका प्रतिनिधि, सञ्चारकर्मी तथा सरोकारवालाको उल्लेख्य उपस्थिति रहेको थियो । सभाले नीति तथा कार्यक्रममार्फत तानसेनलाई अझ व्यवस्थित, समावेशी, पारदर्शी र दिगो विकासतर्फ अघि बढाउने जनाएको छ ।
सम्बन्धित खवर
