पाल्पा — रैनादेवी छहरा गाउँपालिकाको पहल र नेपाल टेलिकमको सहकार्यमा दुर्गम क्षेत्रका वडा नं. ६ बल्ढेङ्गढी, सत्यवती, म्यालढाप, तिनाउ कचललगायतका बस्तीमा अब गुणस्तरीय मोबाइल नेटवर्क सुविधा पुगेको छ।
गाउँपालिकाका अध्यक्ष रूक्मागत भट्टराईले यसलाई गाउँको भविष्यसँग जोडिएको ऐतिहासिक कदम भएको बताउनुभयो। उहाँका अनुसार, लामो समयदेखि सञ्चार पहुँचको अभावका कारण शिक्षा, स्वास्थ्य, व्यवसाय र प्रशासन क्षेत्रमा चुनौती सिर्जना हुँदै आएको थियो।
हाम्रो प्राथमिक लक्ष्य नै गाउँमा सशक्त सञ्चार पूर्वाधार निर्माण गर्नु थियो, अध्यक्ष भट्टराईले भन्नुभयो, टावर निर्माणले आपतकालीन सेवा पनि प्रभावकारी बनाएको छ।
गाउँपालिकाले यस परियोजनालाई प्राथमिक विकास एजेन्डामा राखी नेपाल टेलिकमसँग निरन्तर समन्वय गर्दै गुर्हाठाना कालिका मन्दिर डाँडामा अत्याधुनिक टेलिकम टावर निर्माण गरेको हो। टावर निर्माणको क्रममा भौगोलिक कठिनाइ र वर्षातका कारण सामग्री ढुवानीमा चुनौती भए पनि अन्ततः सफलता हात लागेको उहाँले स्मरण गर्नुभयो।
अध्यक्ष भट्टराईका अनुसार, यस परियोजनाले गाउँको सामाजिक, शैक्षिक र आर्थिक जीवनमा सकारात्मक परिवर्तन ल्याएको छ। अब बस्तीमा स्पष्ट र स्थिर मोबाइल सिग्नल उपलब्ध भएको छ। विद्यार्थीले अनलाइन कक्षा सहजै लिन सक्ने, स्वास्थ्यकर्मीले तुरुन्तै चिकित्सकसँग सम्पर्क गर्न सक्ने र व्यवसायीले प्रत्यक्ष बजारसँग जोडिन सक्ने अवस्था बनेको छ।
गाउँपालिकाले सोही स्थानमा २०० वटा सिम कार्ड निस्शुल्क वितरण गरेको छ, जसबाट विशेषगरी स्वास्थ्य चौकी, विद्यालय, सहकारी संस्था र आर्थिक रूपमा कमजोर परिवार प्रत्यक्ष लाभान्वित भएका छन्। भविष्यमा इन्टरनेटको गति बढाउने, डिजिटल शिक्षा विस्तार गर्ने, स्मार्ट कक्षा सुरु गर्ने र अनलाइन स्वास्थ्य सेवा उपलब्ध गराउने योजना रहेको अध्यक्ष भट्टराईले जानकारी दिनुभयो।
यो केवल टावर निर्माणको कथा मात्र होइन, यो गाउँको सामाजिक, आर्थिक र शैक्षिक विकाससँग प्रत्यक्ष जोडिएको परियोजना हो,उहाँले भन्नुभयो, हामीले योजना बनायौं, कार्यान्वयन गर्यौं र यसले दीर्घकालीन प्रभाव पार्नेछ।
उहाँले यस कार्यमा स्थानीय जनताको श्रम, सामग्री तथा सहयोग र नेपाल टेलिकमको सक्रिय सहभागितालाई विशेष धन्यवाद दिनुभयो। स्थानीय समुदायको साथ र टेलिकमसँगको प्राविधिक सहयोगले नै यो सम्भव भएको हो, अध्यक्ष भट्टराईले बताउनुभयो।
गाउँपालिकाले यस परियोजनालाई दुर्गम क्षेत्रको जीवनस्तरमा स्थायी परिवर्तन ल्याउने ऐतिहासिक कदमका रूपमा लिएको छ। अब गाउँका नागरिकले घरमै बसेर शिक्षा, स्वास्थ्य, व्यवसाय र प्रशासनिक सेवामा पहुँच पाउने भएका छन्।
सम्बन्धित खवर
