पाल्पा — रैनादेवी छहरा गाउँपालिका–३ भुवनपोखरीमा मौलिक तीज गीत प्रतियोगिता सम्पन्न भएको छ। वडा कार्यालयको आयोजनामा भएको टोलस्तरीय कार्यक्रममा पाँच समूहले प्रतिस्पर्धा गर्दै परम्परागत भाका र लयमा मौलिक तीज गीत प्रस्तुत गरेका थिए।
कार्यक्रमको उद्देश्य मौलिक संस्कृति जगेर्ना र महिलाबीचको आपसी सम्बन्ध मजबुत बनाउनु रहेको आयोजकले जनाएका छन्। पछिल्ला वर्षमा तीज गीतमा छाडा शब्द र बाह्य प्रभाव हावी भएको देखिएकाले भुवनपोखरीले यस वर्ष बजेट विनियोजन गरेर मौलिक तीज गीत प्रतियोगिता आयोजना गरेको हो।
प्रतियोगितामा सहभागी समूहहरूले गीतमार्फत गाउँमा हाल देखापरेका सामाजिक, आर्थिक र वातावरणीय समस्याहरू उजागर गर्दै स्थानीय सरकारलाई सम्बोधन गरेका थिए। बँदेल, बाँदर र दुम्सी जस्ता जंगली जनावरले खेतीपातीमा पुर्याएको क्षतिको नियन्त्रण, बसाईसराई रोकथाम, महिला हिंसा र बलात्कारका घटनामा कडाइ, शिक्षा तथा स्वास्थ्य सुधार र भ्रष्टाचार नियन्त्रणजस्ता माग गीतमै व्यक्त गरिएका थिए।
प्रतियोगिताले मात्र सांस्कृतिक रचनात्मकता प्रदर्शन गरेन, यसले समुदायका मुद्दा उजागर गर्ने माध्यमको रूपमा पनि भूमिका खेलेको सहभागीहरूको भनाइ छ। पुरानो भाका र लयमा गाईएका गीतमा स्थानीय दिदीबहिनीहरू नाच्दै रमाइलो मञ्च प्रस्तुत गरेका थिए, जसले दर्शकलाई आकर्षित मात्र गरेन, सन्देशमूलक भावना पनि दिलायो।
कार्यक्रममा प्रमुख अतिथि गाउँपालिका अध्यक्ष रुकमाङ्गत भट्टराई, वडा अध्यक्ष प्रदीप पौडेल, राजनीतिक दलका प्रतिनिधि, विद्यालयका प्रधानाध्यापक, महिला समूहका सदस्य र स्थानीय बासिन्दाहरूको उपस्थिति रहेको थियो।
प्रतियोगितामा जनजागृती आधारभूत विद्यालय पेलाबास प्रथम, कैलासपुर आमा समूह द्वितीय र सिखरपोखरी स्वास्थ्य समूह बल्घा तृतीय भएका थिए। प्रथम, द्वितीय र तृतीय स्थान प्राप्त समूहलाई क्रमशः रु. १०,०००, रु. ८,००० र रु. ६,००० नगद, प्रमाणपत्र र सहभागी समूहलाई यातायात खर्चका लागि रु. १,००० प्रदान गरिएको थियो।
कार्यक्रमका प्रमुख अतिथि गाउँपालिका अध्यक्ष रुकमाङ्गत भट्टराईले मौलिक संस्कृति संरक्षण सबैको जिम्मेवारी भएको बताउँदै भुवनपोखरीको पहल सराहनीय रहेको उल्लेख गर्नुभयो। वडा अध्यक्ष प्रदीप पौडेलले तीज पर्वलाई पुरानो स्वरूपमा फर्काउन यस्तो कार्यक्रम आवश्यक रहेको बताउनु भयो,उहाँले भुवनपोखरीको पहल सराहनीय रहेको र यसलाई अन्य वडामा पनि फैलाउन सकिने बताउनुभयो।
सम्बन्धित खवर
