२४ भदौ, काठमाडौं । देशभर फैलिँदै गएको जेनजी आन्दोलन काठमाडौंमा झनै आक्रामक बन्दै गएको छ । आन्दोलनकारीहरू सोमबार साँझ पूर्वप्रधानमन्त्री एवं नेपाली कांग्रेसका सभापति शेरबहादुर देउवाको निवासमै पुगेका थिए । प्रदर्शनकारीहरूले ढोका तोडेर घरभित्र प्रवेश गर्दै देउवा र उनकी पत्नी सांसदसमेत रहेकी डा. आरजु राणा देउवालाई कुटपिट गरेका छन् ।
स्रोतका अनुसार जेनजीहरू आकस्मिक रूपमा बलकुमारीस्थित देउवाको निवासमा पुगेका थिए । सुरक्षाकर्मीहरूले रोक्ने प्रयास गरे पनि आक्रोशित भीडलाई नियन्त्रणमा लिन नसक्दा उनीहरू घरभित्र पसेर देउवा दम्पतीमाथि हातपातसम्म गरेका हुन् । घटनामा देउवा र राणा दुवै घाइते भएको बताइएको छ । उनीहरूलाई तत्काल उपचारका लागि नजिकैको अस्पताल लगिएको जनाइएको छ ।
नेपाली कांग्रेसका नेताहरूले यस घटनाप्रति तीव्र आक्रोश व्यक्त गरेका छन् । पार्टी प्रवक्ता प्रकाशशरण महतले विज्ञप्ति जारी गर्दै यसलाई लोकतन्त्रविरुद्धको क्रूरतम आक्रमणको संज्ञा दिएका छन् । उनले राज्यलाई तत्काल घटनाको सत्यतथ्य सार्वजनिक गर्न, दोषीलाई कारबाही गर्न र पूर्वप्रधानमन्त्रीको सुरक्षाबारे गम्भीर ध्यान दिन माग गरेका छन् ।
त्यसैगरी, नेपाली कांग्रेसभित्रै पनि नेताहरूबीच सुरक्षा व्यवस्थामा भएको कमजोरीबारे चर्को आलोचना भएको छ । नेताहरूले उच्चस्तरीय नेतृत्वलाई लक्षित गरेर भएको आक्रमणले आन्दोलन नियन्त्रणभन्दा बाहिरिएको प्रमाणित भएको भन्दै सरकारलाई तत्काल प्रभावकारी कदम चाल्न चेतावनी दिएका छन् ।
यसबीच, घटनास्थल वरपर थप भिड बढ्न नदिन प्रहरीले कडा निगरानी बढाएको छ । राजधानीमा सुरक्षाकर्मीहरूलाई उच्च सतर्कतामा राखिएको छ भने रातभर विभिन्न स्थानमा आकस्मिक भिडन्त हुने आशंका गरिएको छ ।
विश्लेषकहरूले देउवा दम्पतीमाथिको आक्रमणलाई मुलुकको राजनीतिक स्थिरतामाथिको ठूलो आघातका रूपमा लिएका छन् । जेनजीको आन्दोलन सुरुवाती दिनदेखि नै आक्रामक देखिँदै आएको भए पनि राजनीतिक नेतृत्वमाथि सीधै आक्रमण भएको यो पहिलो घटना हो । यसले आगामी दिनमा देशमा थप अशान्ति र अनिश्चितता बढ्ने चिन्ता बढाएको छ ।
सम्बन्धित खवर
